Ц.Бат-Энхэд бизнес ангилалын суудал гаргаж өгсөн МИАТ-ын дэд захирал ажлаасаа халагдлаа

Өнөөдөр буюу 2020 оны хоёрдугаар сарын 28-нд МИАТ-ын зөвлөл хуралдаж, Коммер эрхэлсэн дэд захирал Ш.Гантулгыг чөлөөлжээ. Учир нь МАН-ын дарга Ц.Бат-Энхэд байгууллагын болон холбогдох дүрэм зөрчин, бизнес ангилалын суудал гаргаж өгсөн гэж түүнийг буруутгасан аж. 

Ц.Бат-Энх БНСУ-д хөл хорионд орохгүйн тулд Японоор дамжин ирэх үедээ Нарита нисэх онгоцны буудалд хоёр өдөр өнжихдөө МИАТ компаниас зочид буудлын төлбөр болох нэг өдрийн 500 ам. доллараар тооцон хоёр өдрийн мөнгө нэхэж, хэл ам гаргаж эхэлжээ. Түүнтэй хамт БНСУ-аас Нарита нисэх буудалд МУ-ын 36 иргэн очсон бөгөөд тэднээс ялгарах гэсэн оролдлого мэт харагдаж байна.

Ингээд Японоос Улаанбаатар луу нисэх үед тухайн 37 зорчигчийг онгоцны арын суудалд тусгаарлахаар шийдвэр гарахад мөн л Ц.Бат-Энх эсэргүүцэн, “Бизнес ангилалд сууна, арын суудалд зорчихгүй” хэмээн маргаан гаргасаар онгоц хөөрчээ. Нислэгийн үеэр Ц.Бат-Энх бизнес ангилал руу дур мэдэн шилжин сууж, ирсэн байна. Өндөр эрсдэлтэй бүсээс ирсэн тэрбээр ийнхүү онгоцны зорчигчдыг эрсдэлд оруулсаар Улаанбаатарт ирсэн байна.