Д.Бямбаа: ХНХ-ын салбарыг С.Чинзориг самарч байна, удирдлагад нь ажилладаг гээд булхайг нь нуугаад сууж чадахгүй нь

Хөдөлмөр нийгмийн хамгааллын яамны ахмад ажилтан, тус яамны мэргэжилтэн Д.Бямбаа манай редакцид хандан салбарынхаа болоод сайдынхаа хууль бус үйлдлүүдийг илчлэн ярьсан юм. Тэрбээр энэ салбарт тасралтгүй 35 жил ажилласан бөгөөд сүүлийн жилүүдэд салбарын бодлого, албан тушаалтнуудын хуулийн зөрчил хэрээс хэтэрч байгааг С.Чинзориг сайдад хувьчлан олон удаа хэлсэн боловч өөрчлөлт гарахгүй байгаа тул ийнхүү олон нийтэд хандаж байгаагаа хэлсэн юм.

Тэрбээр тус салбар дахь гурван асуудлыг энэ удаагийн ярилцлагаараа онцолсон. Тодруулбал,

- Дампуурлын ирмэгт ирээд байгаа Нийгмийн даатгалын сан ийм нөхцөлд хүрэх шалтгаан нь сайдын буруу бодлоготой холбоотой болохыг хэлэв. НДС-ын нийт 240 тэрбум төгрөгийг УИХ-ын гишүүн Д.Ундармаагийн гэр бүлийн бизнес болох Капитал банкинд хадгалуулах шийдвэрийг С.Эрдэнэ, С.Чинзориг нар гаргасан нь иргэдийн мөнгөөр өөр бусдыг тэтгэх алхам болсныг хэллээ. Ингэхдээ тухайн үед гаргасан захирамж, шийдвэрүүдээр баталгаажуулан ярьсан юм.

- ХНХ-ын салбарын авлигын асуудлуудыг ил гарган ярьсан. Ингэхдээ ЭМДЕГ-ын дарга, НДС-ын дарга нараар дамжуулан тус сангийн мөнгүүдийг зориулалт бусаар ашиглагч нь одоогийн сайд С.Чинзориг гэдгийг хэлэв.

- МУ-ын хүний нөөцийн бодлогыг барьдаг энэ салбарт боловсон хүчний хомсдол үүссэн. Тодруулбал, дипломгүй хүмүүс МСҮТ-ийн захирлаар томилогддог, салбарын сайчуудыг хомроголон ажлаас нь халдаг асуудлыг хөндсөн. Нийт 42 МСҮТ-ийн захирлыг хоёрхон тушаалаар долоо хоногийн хугацаанд Н.Номтойбаяр сайд ажлаас нь чөлөөлсөн бөгөөд тэдний зарим нь "хууль бусаар халагдсан" хэмээн шүүхэд хандсан байна. Ингээд ажлаасаа чөлөөлөгдсөн 12 хүн нь гурван шатны шүүхээр "үндэслэлгүйгээр халагдсан нь" тогтоогдсон байна. Гэвч ажилдаа эргэн томилогдож чадалгүй хоёр жилийн хугацаа өнгөрчээ.

Эдгээр асуудлуудыг салбарын ахмад ажилтны хувьд ил болгон ярьсныг хүргэж байна.