СУДАЛГАА: У.Хүрэлсүх, С.Амарсайхан нар одоогийн албанд ирснээсээ хойш хамгийн өндрөөр үнэлэгдсэн нь 11-р сар байлаа

МЭК судалгааны байгууллагаас сар бүр улстөрчдийн болоод УИХ-ын ретингийн судалгааг явуулдаг.. Тэгвэл энэ 11-р сарын судалгааны дүн гарсан байна. Судалгаанд 700 иргэн хамрагджээ.

Уг судалгаагаар хамгийн өндөр оноо авсан хүн бол Ерөнхий сайд У.Хүрэлсүх байлаа. Нийт 10 онооноос 6.4 оноо авсан нь түүний энэ албан тушаалд ирснээсээ хойш авч байгаа хамгийн өндөр дүн юм. Ийнхүү өндрөөр үнэлэгдэх болсон шалтгаан нь Улаанбаатарын утаа багассан, БНХАУ-ын 800 иргэнийг албадан гаргасан ажиллагаа нь олон нийтэд таалагдах түлхэц болсон бололтой.

Мөн хотын дарга С.Амарсайханыг ч олон нийт энэ сард хамгийн өндрөөр үнэлсэн байна. мөн л утааны хэмжээ багассан нь түлхэц болсон гэж судалгааны байгууллага үзэж байна. Тэрбээр мөн л энэ албан тушаалд ирснээсээ хойш хамгийн өндрөөр үнэлэгдэж байгаа тохиолдол буюу 4.4 оноо юм. Сонирхуулахад, хотын өмнөх дарга С.Батболдыг иргэд ганц ч удаа энэ 4 хүртэл оноогоор үнэлж байгаагүй байна.

Харин Улаанбаатарын иргэдэд үйл ажиллагаа нь хамгийн их таалагддаг улстөрчөөр МУ-ын Ерөнхийлөгч Х.Баттулга, Ерөнхий сайд У.Хүрэлсүх нар хамгийн өндөр дүнг үзүүлсэн байна.