ТАНИЛЦ: СЗХ-ны даргын албан тушаалд горилогсод

Энэ сарын 5-ны өдөр Санхүүгийн зохицуулах хорооны дарга С.Даваасүрэн албан тушаалаасаа чөлөөлөгдөх өргөдлөө өгсөн. Тэрбээр "Бий болсон гажуудлаа засахын оронд үүнийг ашиг хонжоо олох хэрэгсэл болгож, өнгө зүсээ өөрчилсөн өөр өөр гажуудлыг шинээр төрүүлсээр байна. Гажуудлыг нь шинэ гажуудуулагчид хамгаалж, хаацайлж, харсан ч хараагүй мэт хүлцэнгүй дүр эсгэж, багийн дүрмээ баримталж, багцын нөлөөллөө нэмэгдүүлэхийн тулд улайран зүтгэдэг юм байна. Төрийн алба, түмний төлөөх ажил иййм байдлаар явж хэрхэвч болохгүй. Үүнтэй миний бие огтоос үл эвлэрнэ" хэмээн мэдэгдэл хийсэн. Ингэснээр эзгүйрч үлдсэн Санхүүгийн зохицуулах хорооны даргын суудалд горилох хүмүүсийн нэрс яригдаж эхэллээ. Тодруулбал, Д.Баярсайхан, Д.Энхжаргал, Ж.Цэдэнрагчаа нарын нэр дуулдаж байгааг эх сурвалж мэдээлж байна.

Д.Баярсайхан нь СЗХ-ны Дэд даргаар ажилладаг, УИХ-ын дарга Г.Занданшатарын "хүн" гэж яригддаг. Мөн тэрбээр УИХ-ын гишүүн Д.Лүндээжанцангийн хамаатан юм.

Д.Энхжаргал нь Монголбанкны Дэд ерөнхийлөгч, тус банкны Лондон дахь төлөөлөгчөөр ажиллаж байсан. Мөн нь л УИХ-ын дарга Г.Занданшатарын хамааралтай хүн буюу тэд нэг ангийнхан юм. Мөн Азийн хөгжлийн банк, Дэлхийн банкинд зөвлөхөөр ажиллаж байсан. 2018 оны аравдугаар сард "Оюутолгой" компанийн ТУЗ-ийн гишүүнээр томилогдон ажиллаж байхад нь Засгийн газраас чөлөөлөх чиглэл өгснөөр албан тушаалаасаа буугаад байгаа.

Ж.Цэдэнрагчаа нь Үнэт цаасны арилжаа эрхлэгчдийн холбооны Удирдах зөвлөлийн даргаар, Санхүүгийн зохицуулах хорооны орон тооны бус гишүүнээр ажиллаж байсан түүнийг энэ албанд томилуулахаар Ерөнхий сайд У.Хүрэлсүх, УУХҮ-ийн сайд Д.Сумъяабазар нар дэмжиж байгаа гэх эх сурвалжийн мэдээлэл байна.