ХИШИГ АРВИН ИНДУСТРИАЛ ХХК ТАЛИЙГААЧИЙН ҮХЭЛД ХОЛБОГДСОН ХОЁР АЖИЛТНАА ХАЛЖЭЭ

ХНХЯ-ны мэргэжилтэн Б.Болороогийн нөхөр ажил үүргээ гүйцэтгэж байхдаа амь насаа алдсан хэрэг цагдаагийн байгууллагад шалгагдаад дөрвөн сарын хугацаа өнгөрч байна. Харин шалгалтын ажиллагаа нэг талыг барьсан байдалтай явагдаж байгаа талаар өнөөдөр Б.Болороо хэвлэлийн хурал зарлан мэдээлсэн.

Түүний мэдээлэлд нэр дурдагдсан Хишиг арвин индустриал ХХК-ийн ажилтан н.Мядаг, н.Бадамдорж нар нь талийгаачийг амиа алдахаас өмнө хамгийн сүүлд холбоотой байсан хүмүүс гэдгийг хэлсэн. Тодруулбал, н.Мядаг нь талийгаач руу утсаар ярьж "Лифт ажиллахаа больсон байна, Засаарай" гэж зааварчилсны дагуу талийгаач тухайн лифт рүү очиж, улмаар амиа алдсан. Гэтэл талийгаачийг хайж байх хугацаанд н.Мядаг нь энэ талаараа хэлээгүй нь талийгаачийг олоход хугацаа алдсан гэж талийгаачийн ар гэрийнхэн үзэж байгаа юм.

Харин Хишиг арвин индустриал ХХК-ийн Ээлжийн ахлагч н.Бадамдорж нь талийгаачийн Samsung S6 загварын гар утсыг нь авч, зургаан хоног ашигласныг сүүлд олж мэдэж, цагдаагийн байгууллагад мэдэгдэн, шалгуулж байгаа талаар Б.Болороо ярьсан юм. Талийгаач хоёр утастай байсан бөгөөд н.Мядагтай ярьсан утсаа халаасандаа хийсэн байжээ. Харин нөгөө утас болох Samsung S6 утсаа ажлынхаа байранд үлдээгээд явсныг ээлжийн ахлагч н.Бямбадорж нь өөртөө авч, ашиглаж байсан нь ил болсон байна.

Бид Таван шар орчимд байх "Хишиг арвин индустриал" ХХК-ийн байранд очиход харуул хамгаалалтын ажилтнууд нь нэвтрүүлэхгүй, "компанийн удирдах ажилтнууд ажлын байран дээрээ байхгүй. Хэргийг цагдаагийн байгууллага мөрдөн шалгаж байгаа тул шалгалтын ажиллагаа дуустал мэдээлэл өгөхгүй" гэсэн байдалтай байна.

Харин бидний олж мэдсэнээр Хишиг арвин индустриал ХХК талийгаачийн үхэлд холбогдох н.Мядаг, н.Бадамдорж нарыг ажлаас нь халжээ. Ингэхдээ ээлжийн ахлагчаар ажиллаж байсан. Н.Бадамдоржийн хөдөлмөрийн гэрээг түр хугацаагаар цуцалсан бол н.Мядагийг бүр чөлөөлсөн байна.