З.Баянсэлэнгийг цагдан хорих шүүхийн шийдвэр гарсан ч тэрбээр 461-р ангид очоогүй байна

Өнөөдөр Сонгинохайрхан дүүргийн Эрүүгийн хэргийн анхан шатны шүүхэд Барилга хот байгуулалтын сайд асан З.Баянсэлэнгэ, М.Болортуяа нарт холбогдох хэргийг шүүх хурал болох байсан ч тэрбээр шүүх бүрэлдэхүүнээс татгалзсанаар хойшилсон юм. Үүнтэй холбогдуулан түүнийг шүүхийн байгууллагад хүндрэл учруулсан хэмээн үзэж, цагдан хорих, таслан сэргийлэх арга хэмжээ авчээ.

З.Баянсэлэнгийг Барилга, хот байгуулалтын сайдаар ажиллаж байхдаа албан тушаалын байдлаа урвуулан ашиглаж, "Бэрэн групп" ХХК-ийн барьсан "Хангай" хотхоны орон сууцнаас 123 айлын орон сууцыг тендер зарлалгүйгээр худалдан авч, улсын төсөвт 972.4 сая төгрөгийн хохирол учруулсан байж болзошгүй хэргээр шүүж буй.

Түүнийг цагдан хорих шүүхийн шийдвэр гарсан ч 20:30 минутын байдлаар урьдчилан хорих 461-р ангид З.Баянсэлэнгийг аваачаагүй байгаа бөгөөд түүний өмгөөлөгч нь тус хорих байрны жижүүрийн хэсэгт хүлээж байна.