З.БАЯНСЭЛЭНГЭ, ШИНЖАН ШИНФАН КОМПАНИЙН ХЭРГИЙГ НЭГТГЭЖ ШҮҮХЭЭР БОЛЖЭЭ

Чингэлтэй дүүргийн Эрүүгийн хэргийн анхан шатны шүүхэд өмнөх парламентын үед УИХ-ын гишүүн байсан З.Баянсэлэнгэ нарт холбогдох хэргийг хэлэлцэхээр товлон 10.00 цагт хурлыг эхлүүлсэн юм. Гэвч З.Баянсэлэнгэ болон түүний өмгөөлөгч Чингэлтэй дүүргийн Эрүүгийн хэргийн анхан шатны шүүхээр хэргээ шийдвэрлүүлэхгүй хэмээжээ. Ингэснээр тус шүүхийн нийт шүүгчдийн зөвлөл хуралдах хүртэл хурлыг тодорхойгүй хугацаагаар хойшлууллаа.

Хэргийг дахин сануулахад З.Баянсэлэнгэ болон БХБЯ-ны мэргэжилтэн М.Болортуяа нарт холбогдох энэхүү хэрэг буцаж задарч Төрийн банкны хэрэгтэй нэгтгэгдэх хэмжээнд хүрчээ. Учир нь М.Болортуяагийн өөр нэг үйлдэл нь Төрийн банкны захирлуудын хэрэгтэй холбогдсон учраас тагнуулын байгууллагад маш нууц байдалд шалгасан Д.Баярсайхан нарт холбогдох үйлдэлтэй нэгтгэн НПГ-аас яллах дүгнэлт үйлдсэн аж.

Тус банкны ерөнхий захирал Д.Баярсайхан нь БНХАУ-ын "Шинжан шинфан" компанид 20 тэрбум төгрөгийн зээл зургаан сарын хугацаатай олгосон.

Эргэн төлөгдөх хугацаа 2017 оны арванхоёрдугаар сарын 22-нд дууссан ч дээрх компани зээлээ төлөөгүй юм. Уг зээлийг олгохдоо Д.Баярсайхан Банкны тухай болон өөр нэг бус хууль зөрчсөн хэрэгт холбогдуулан ТЕГ-ын Мөрдөн байцаах газарт шалгасан юм. Мөн Төрийн банканд гүйцэтгэх захирлаар ажиллаж байсан Б.Цэндсүрэн, тус банкны тэргүүн дэд захирал Д.Ганбаатар нарыг 4.7 тэрбум төгрөгийн зээл олгохдоо эрх мэдэл албан тушаалаа урвуулж, 98 000 ам.доллар авч, тавилга, бусад эд зүйл хувьдаа авсан хэрэгт буруутгасан байдаг. Дээрх хэрэгт холбогдуулан Ц.Энхтунгалаг, Ж.Бурмаа, Л.Чинбат, Г.Тогтохбаатар, Б.Эрдэнэбаатарыг яллагдагчаар татсан бөгөөд "Шинжан шинфан" ХХК-ийн захирал Сун Гуан Чиныг цагдан хорьж шалгаж байгаа билээ.