УИХ ТАРАХ АСУУДЛААР МАН ХОЁР ХУВААГДЖЭЭ

Г.Занданшатарын танхим тарах уу, үлдэх үү гэдэг салаа замын уулзвар дээр ирээд байна. Ангийн дарга Г.Занданшатар нь тарах сонирхолтойгоо илэрхийлээд байгаа нь улсын "нэгдүгээр" хүний атганд орсон гэж хэлэхэд хатуудахааргүй байдалтай байна. Тэрбээр тараад, ахиад сонгууль явуулах сонирхолтой байгаагаа илэрхийлсэн.

УИХ-ын тухай хуульд зааснаар нийт гишүүдийн гуравны хоёр нь буюу 51 гишүүний дэмжлэг авсан тохиолдолд УИХ өөрөө тарах зохицуулалттай.Танхимдаа цуглаад хуралдаж чадахаа байсан эрх баригчдын бүлэг энэ асуудал дээр эмээлийн бүүрэг шиг хоёр тийшээ харах нь ойлгомжтой байна.

УИХ дахь МАН-ын 33-ын бүлэгт ЖДҮ-чин гишүүд голдуу багтдаг учир хүссэн хүсээгүй муулуулж баалуулж байснаас хугацаанаасаа өмнө тараад ахин сонгуульд орж "азаа үзэх" сонирхолтой байх нь дамжиггүй.

Харин 27-ын бүлэг нь тарах асуудал дээр хоёр хуваагджээ. 27-ийн бүлэг буюу М.Энхболдын фракциас Д.Оюунхорол, Н.Оюундарь, О.Содбилэг нар "урвасан". Тэд 33-ын бүлгээ дэмжиж, тодруулбал, УИХ-ыг тарахыг дэмжинэ гэсэн үг. Харин 33-ын бүлэг тэр чигтээ УИХ-ыг тарахыг дэмжихгүй байгаа гэх мэдээлэл бий. Тодруулбал Д.Сумъяабазарын фракци болох СХД-ийн таван гишүүн, Ц.Нямдоржийг дагалдагчид дэмжихгүй байр суурьтай байгаа ажээ.