ХУРУУНЫ ХЭЭ УНШДАГ ТӨХӨӨРӨМЖИЙГ УИХ-ЫН ГИШҮҮД ЭВДЭХИЙГ САНААРХАЖ БАЙНА УУ?

УИХ-ын гишүүд хурууны хээгээр саналаа өгөх төхөөрөмжийг 600 сая төгрөгөөр суурилуулсан. Гэтэл УИХ-ын эрхэм гишүүд энэ төхөөрөмждөө дасахгүй хагас жил болж байна. Учир нь төхөөрөмж байсхийгээд л гацдаг, эвдэрдэг, саатдаг үзэгдэл хэвээр байсаар байна. Энэхүү эвдрэл гэмтэл нь төхөөрөмжиндөө бус харин УИХ-ын эрхэм гишүүдэд учир байдаг бололтой.

Хурууны хээгээр саналаа өгснөөс хойш УИХ-ын гишүүд нэг нэгнийнхээ өмнөөс кноп дарж чадахаа байсан. Өөрөөр хэлбэл УИХ-ын гишүүд ирцээ хүчээр бүрдүүлж, бусдын өмнөөс санал өгч кнопыг дарж "төгөлдөр хуур" тоглож чадахаа байсан нь лоббинынх нь хууль явахгүй том гацаа үүсгээд байгаа юм. Тиймээс төхөөрөмжийг зориудаар гэмтээх гэж зарим түшээд хурууныхаа хээг янз бүрээр дардаг гэнэ. Тэрхүү дүрс бичлэг нь ч УИХ-ын Тамгын газрын техникийн хэлтэст хадгалаатай байдаг ажээ. Тодруулбал төхөөрөмж саатуулж, хурууны хээгээ уншуулах хүсэлгүй гишүүд хумсаараа, эсвэл өндгөөрөө өнгөц, хурууныхаа хажуугаар уншуулах гээд олон төрлийн зураг нь холбогдох албаны хүнд баримт болон хадгалагдаж байдаг юм байна.