Б.БАТТҮШИГ НАРТ 5-8 ЖИЛИЙН ЯЛ ТӨЛӨВЛӨСӨН ШҮҮХ ХУРАЛ ОНЫ ӨМНӨ БОЛНО

Өнгөрсөн тавдугаар сард Истанбул дахь Консулын газрын дэд консул Б.Баттүшиг, жолооч С.Эрдэнэбаяр нар Чех улсаас ХБНГУ-ын хилээр нэвтрэх үедээ дипломат албан машинаар 70 кг хар тамхи тээвэрлэж байгаад баригдсан.

Тэдний хэргийг тус улсын хуулийн хүрээнд шалгаж байгаа бөгөөд Б.Баттүшиг, С.Эрдэнэбаяр нарт холбогдох шүүх хурал энэ оны сүүлээр болох тов гарчээ. Тэднийг яллаж байгаа хуулийн зүйлчлэлээр 5-8 жилийн хорих ял төлөвлөөд байгаа аж. Хэрэгт холбогдогчид хоригдон шалгагдаж байгаа бөгөөд Б.Баттүшигийн эхнэр, гэр бүлийнхэн болон өмгөөлөгч нь Германд очоод байгаа юм байна.

Эргэн сануулахад, Б.Баттүшиг нь өмнө нь Тагнуулын байгууллагад ажиллаж байсан. ГХЯ-ны шугамаар хоёр ч удаа үүрэг гүйцэтгэж ажиллаж байгаа, дипломат албаны шаардлага хангасан ГХЯ-наас томилогдсон дипломат ажилтан юм. Тэрбээр томилогдоод удаагүй байхдаа богино хугацаанд ийм ноцтой гэмт хэрэгт холбогдсон юм.

Хар тамхи тээвэрлэж явсан автомашин нь жолооч С.Эрдэнэбаяр хувийн автомашин гэх бөгөөд дипломат дугаар зүүсэн байдаг. Өөрөөр хэлбэл, дипломатууд тухайн орондоо хүсэлт гаргаад хувийн автомашиндаа дипломат дугаар авч болдог ба ийм машиныг хэрэг үйлдэхдээ ашигласан байж болзошгүй нөхцөл байдал үүсээд байгаа.

Энэ хэрэгт холбогдуулан Б.Баттүшиг, С.Эрдэнэбаяр нараас өөр хүнийг нэмж шалгаагүй байна.