У.ХҮРЭЛСҮХ АХ НАРАА БАЯРЛУУЛАХ УУ, АХ НАРАА ГОМДООХ УУ ГЭДЭГ СОНГОЛТЫН ӨМНӨ БАЙНА

Цэрэг бүхний цээжинд генерал болох хүсэл байдаг шиг УИХ-ын гишүүн бүрийн дотор УИХ-ын дарга болох мөрөөдөл бий. Энэ ч утгаараа УИХ-ын дарга М.Энхболдыг нийлээд огцруулсан УИХ-ын гишүүд даргын сэнтийгээс үүдээд хэд хэд хуваагдан өрөө өрөөндөө сэм ярилцах боллоо. МАН-ын Удирдах зөвлөл хуралдаж дараагийн УИХ-ын даргыг тодруулах ёстой. УИХ-ын даргыг МАН-ын дарга У.Хүрэлсүхийн зүгээс санал болгох учиртай. МАН-ын удирдлагууд өчигдөр гурваас дээш удаа сонгогдсон гишүүдтэй уулзаж санал солилцсон гэх мэдээлэл ирлээ. Тодруулбал Ц.Нямдорж, Ө.Энхтүвшин, Д.Лүндээжанцан, Ч.Улаан, Н.Энхболд, Д.Оюунхорол нарын гишүүдтэй уулзжээ. Мэдээж У.Хүрэлсүхийн шийдвэр голлох учраас тэр өөрийнхөө талын хүнийг зүтгүүлэх сонирхолтой. Харин МАН-ын удирдлагууд энэ удаад залуучуудаа дэмжиж, өөрчлөлтийг хүсч УИХ-ын даргаа тавьж магадгүй юм. Энэ үүднээс дэмжигдэх магадлалтай, У.Хүрэлсүхийн үгнээс гардаггүй Г.Занданшатар, Ж.Энхбаярын хоёрын нэг УИХ-ын дарга болох өндөр магадлалтай. Т.Аюурсайхан УИХ-ын дарга болох сонирхлоо ойрын хүрээний гишүүдэд илэрхийлжээ. Ерөнхий сайд У.Хүрэлсүхэд ийнхүү бодох хугацаа шаардлагатай байгаа учир өчигдөр болох Удирдах зөвлөлийн хурлаа хойшлуулсан байж мэдэх юм. Өнөөдөр өглөө МАН-ын Удирдах зөвлөл хуралдаж эхэлнэ гэдэг мэдээлэл ирлээ.

Н.ӨНӨР