Ш.БАТХҮҮД ХОЛБОГДОХ ХЭРГИЙГ ШҮҮХЭД ШИЛЖҮҮЛЛЭЭ

Олон жил хууль хяналтын байгууллагад шалгагдаж байгаа "Жаст" группийн ерөнхийлөгч асан Ш.Батхүүд холбогдох албан тушаал, авлигын хэргийг шалгаж дуусчээ.

Тодруулбал, Нийслэлийн прокурорын газраас Авлигатай тэмцэх газар, Цагдаагийн ерөнхий газрын хамтарсан ажлын хэсэг мөрдөн шалгах ажиллагаа явуулсан эрүүгийн 201301000330 дугаартай "Яллагдагч Жаст групп ХХК-ийн захирал Ш.Батхүү нь "Эрдэнэт" үйлдвэр ХХК-ийн нэр бүхий албан тушаалтануудтай санаатай нэгдэж, бүлэглэн "Стандарт" банк "Пи Эл Си"-тэй байгуулсан гэрээний зарим баримтуудыг хуурамчаар үйлдэн нийт 160,100,000.00 ам.долларын буюу 220,276,450,000 /хоёр зуун хорин тэрбум, хоёр зуун далан зургаан сая, дөрвөн зуун тавин мянга/ төгрөгийн зээлийг хуурамч баримт үйлдэн, зохиомол байдлыг зориудаар бий болгон залилан мэхэлсэн. Улмаар залилан өөртөө болон өөрийн хамаарал бүхий аж ахуй нэгжийн үйл ажиллагаанд зарцуулсан хэргийг мөрдөн байцаалтын шатанд тогтоожээ.

Өмнөд Африкийн "Стандарт" банк "Пи Эл Си" нь олон улсын Арбитрын шүүхэд "Эрдэнэт үйлдвэр" ХХК-д холбогдуулан нэхэмжлэл гаргаснаар, Английн Лондон хотын Арбитрын шүүхийн 2016 оны 09 дүгээр сарын 20, 2017 оны 05 дугаар сарын 22-ны өдрийн шийдвэрүүдээр нийт 92,685,803.16 ам.доллар буюу 215,388,407,342.54 / хоёр зуун арван таван тэрбум гурван зуун наян найман сая, дөрвөн зуун долоон мянга, гурван зуун дөчин хоёр/ төгрөгийг "Эрдэнэт" үйлдвэр ХХК-иар төлүүлэхээр шийдвэр гаргасны улмаас төрийн өмчийн оролцоотой "Эрдэнэт" үйлдвэрт их хэмжээний хохирол учирсан юм.

Мөн Ш.Батхүү нь "Алтжин" бөмбөгөрийн Г.Алтан, түүний хүү Э.Сүрэн нартай санаатай нэгдэж бүлэглэн, "Иргэний хэргийн шүүн таслах ажиллагаанд оролцохдоо нотлох баримтыг хуурамчаар бүрдүүлж, Төрийн банкийг залилан мэхлэж их хэмжээний хохирол учруулсан" буюу залилан мэхлэх гэмт хэргийг байнга үйлдэж амьдралын эх үүсвэрээ болгосон" гэх эрүүгийн хэргийг энэ сарын 14-нд прокурорын яллах дүгнэлт үйлдэн, өчигдөр хэргийг Хан-Уул дүүргийн эрүүгийн хэргийн анхан шатны шүүхэд шилжүүлжээ.

Ийнхүү шүүх хурлаар Ш.Батхүүгийн гэм буруутай эсэхийг нь хэлэлцэж, "Стандарт" банкинд учруулсан их хэмжээний мөнгийг "Эрдэнэт" үйлдвэр үү, эсвэл яллагдагч Ш.Батхүү барагдуулах уу гэдгийг шийдэж шийдвэрээ гаргах юм.