ЦАСАН ШУУРГА ШУУРЧ, БАРУУН ЧИГЛЭЛИЙН ЗАМ ХАЛТИРГААТАЙ БАЙНА

Замын цагдаагийн албаны Орон нутгийн хяналтын хэлтсийн алба хаагчдаас баруун чиглэлд буюу Дархан, Эрдэнэт, Өвөрхангай, Архангай чиглэлийн автозамуудад хяналт шалгалт хийж байна.Нутгийн ихэнх хэсгээр нойтон цас орж цасан ба шороон шуурга шуурч байгаатай холбоотойгоор замын гадаргуу мөстсөн, хальтиргаа гулгаатай байх тул тээврийн хэрэгслийн хурдыг замын нөхцөл байдалд тохируулан зөв сонгон зорчих, үзэгдэх орчин хязгаарлагдмал байгаа тул ойрын гэрлийг асааж явахыг зөвлөж байна.

Мөн 2018 оны 04 дүгээр сарын 04-ний өдрийн 17:00 цагийн байдлаар Баянхонгор, Говь-Алтай, Дорноговь, Дундговь, Өвөрхангай, Өмнөговь, Төв аймгийн нутгаар салхи 16-24 м/с хүртэл ширүүсэн цасан болон шороон шуурга шуурч байна. Түүнчлэн цаг уурын байгууллагаас ирүүлсэн мэдээгээр 2018 оны 4 дүгээр сарын 4-ний шөнө Дорноговь, Дундговь, Сүхбаатар, Төв, Хэнтий аймгуудын нутгаар, 5-ны өдөр Дорнод, Дорноговь, Сүхбаатар аймгуудын нутгаар салхи 18-20 м/с хүртэл ширүүсч цасан шуурга шуурч, хүйтэрнэ гэдгийг албаныхан мэдээллээ.

Иймд:

-Хүчтэй салхи шуурганы үеэр иргэд, тээврийн хэрэгслийн жолооч нар хол, ойрын замд зорчихгүй байх, бага насны хүүхэд, өндөр настан болон хөгжлийн бэрхшээлтэй иргэдэд анхаарал тавих, холбогдох мэргэжлийн байгууллагуудаас гаргасан анхааруулах, сэрэмжлүүлэх мэдээллийг үндэслэн ажлаа зөв зохицуулах;

-Цас их хэмжээгээр орж, хүчтэй салхи шуурга болох үеэр зам даваа хаагдан, цахилгаан дамжуулах агаарын шугамд саатал гарч болзошгүй тул холбогдох мэргэжлийн байгууллагууд хүч хэрэгслийг тодотгон бэлтгэл, бэлэн байдлаа хангах;

-Хүчтэй салхи шуурганы үеэр автозамын зорчих хэсэгт үүссэн хальтиргаа гулгааны улмаас зам, тээврийн осол гарах, автомашин олноор замд саатах, автомашины шатахуун дуусах, эвдрэх, иргэд холбоогүй болох зэрэг тохиолдол гарч зорчигчдын амь нас, эрүүл мэндэд эрсдэл учирдаг тул зайлшгүй тохиолдолд тээврийн хэрэгслийн хөдөлгөөнийг холбогдох хууль тогтоомжид заасны дагуу хязгаарлалт хийдэг тул Онцгой байдлын ерөнхий газрын албан утсанд хандахыг анхаарууллаа.