Д.СУГАР НЬ ЖИЛИЙН 91САЯ ТӨГРӨГИЙН ОРЛОГОТОЙ ГЭЖ МЭДҮҮЛЖЭЭ

Үндсэн хуулийн цэцийн гишүүн Д.Сугарыг "МИАТ"-тай холбоотой их хэмжээний мөнгө угаасан хэрэг болон Эрдэнэт үйлдвэрийг Өмнөд Африкийн Стандарт банкинд тавьсан хэрэгт холбоотой гэж олон нийт харддаг. Гэвч тэрбээр элдэв хэргээс цэвэрхэн гэгч нь өөрийгөө авч гарч чаддаг .

"Эрдэнэт" үйлдвэрийг Стандарт банкинд тавих үед тэрбээр Төрийн өмчийн хорооны дарга байсан бөгөөд баталгаанд гарын үсэг зурсан хүмүүсийн нэг гэдэг. Гэвч тэрбээр "Би Эрдэнэтийг барьцаанд тавих баталгааны хуудсанд гарын үсэг зураагүй. Миний гарын үсгийг хуурамчаар үйлдсэн байна. Хэрвээ зурсан байвал шоронд ороход бэлэн" гэж мэдэгдсэн.

Түүнийг хуулийн байгууллагаар шалгах ёстой боловч Үндсэн хуулийн цэцийн гишүүнийг шалгаж болохгүй гэх хуулийн заалтаар халхавч хийж буй.

Тэгвэл Стандарт банкны өрийг төлж чадахгүй болж Эрдэнэт үйлдвэрийг алдахад хүрээд буй энэ үед Үндсэн хуулийн цэцийн гишүүн Д.Сугарын хөрөнгө, орлогын мэдүүлгийг хүргэж байна.

Тэрбээр төсөөлж байснаас бага хөрөнгийг мэдүүлжээ. Түүний жилийн орлого нь 91 сая төгрөг байна. Энэ 2016 оныхоос даруй 70 орчим сая төгрөгөөр өссөн үзүүлэлт юм. 800 сая төгрөгөөр үнэлэгдэх нэг орон сууцтай, 170 сая төгрөгөөр үнэлэгдэх Лексус 570-1, Ниссан Мурано 1 машинтай, 100 сая төгрөгөөр үнэлэгдэх дөрвөн адуутай, 920 м2-1 газартай, 180 сая төгрөгийн үнэт эдлэлтэй, хадгаламжиндаа 10 сая төгрөгтэй, 180 сая төгрөгийн авлагатай, Оюутолгой ХК-д хувьцаа эзэмшдэг байна.