"ЭРДЭНЭТ ҮЙЛДВЭР"-ИЙН ДАВЖ ЗААЛДАХ ЭРХИЙГ АШИГЛАЛГҮЙ "САНААТАЙГААР" ӨРӨНД УНАГАСАН ЭРХМҮҮДИЙГ ШАЛГАЖ ӨГӨХИЙГ ХҮСЛЭЭ

Английн Олон улсын Арбитрын шүүхээс "Эрдэнэт үйлдвэр" ХХК-ийг ӨАБНУ-ын "Стандарт банк"-д зээлийн хүүгийн хамт 109 сая ам.долларын төлбөр төлөх шийдвэрийг гаргаад байгаа билээ. Үүнтэй холбоотойгоор иргэн Б.Мэргэн холбогдох албан тушаалтнууд ашиг сонирхлын зөрчилтэй шийдвэрүүд гаргасны улмаас "Эрдэнэт"-ийг өрөнд оруулсан байж болзошгүй учраас тэдгээр хүмүүсийг шалгаж өгөх хүсэлтийг Эрүүгийн цагдаагийн албанд гаргасан байна. Тэрбээр хүсэлтдээ Арбитрийн шүүхийн шийдвэрийн холбогдох зүйлүүдийг дурдаад: НЭГ. Их Британи Умард Ирландын Нэгдсэн Вант улс дахь "Жайлесийн баримт бичгийн лабортари"- ийн шинжээч доктор Одрий Жайлесийн Арбитрт гаргаж өгсөн 2014 оны 07 дугаар сарын 03, 2014 оны 11 дүгээр сарын 14, 2015 оны 06 дугаар сарын 17-ний өдрийн нийт 3 удаагийн шинжээчийн дүгнэлтээр Эрдэнэт үйлдвэр санхүүгийн баталгаа гаргасан гэх гэрээнүүд дээр зурсан гарын үсгүүд хуурамч болох нь тогтоогдсон.

Тиймээс Арбитрын шүүх болон Эрдэнэтийн хөлсөлсөн Английн "Taylor Wessing" хуулийн фирмээс 28 хуудас бүхий "Санхүүгийн баталгаа гаргахгүй" гэх гэрээг гаргаж өгөхийг хүссэн боловч Эрдэнэтийн одоогийн удирдлага болон хууль сахиулах байгууллага татгалзсан байна. Хэрвээ тэр гэрээг гаргаж өгсөн бол Монголын тал ялах боломжтой байсан. Тиймээс гэрээг Арбиртр өгөөгүй, өмгөөлөгчдөд танилцуулаагүй албан тушаалтнууд ашиг сонирхлын зөрчилтэй байсан эсэхийг шалгаж өгнө үү.

ХОЁР. Арбитрийн шийдвэрийн дараа Английн Хатан хааны дэргэдэх дээд шүүхийн шүүгч нь Эрдэнэтэд давж заалдах эрх олгосон. Ингэхдээ эхлээд 51 сая ам.долларыг тусгай дансанд байршуулахыг шаардаж байснаа болиод Эрдэнэт үйлдвэр санхүүгийн тайлан, санхүүгийн чадавхтайгаа нотлох баримтыг гаргаж өгвөл давж заалдаж болно гэж шийдвэрлэсэн. Гэтэл энэ боломжоо ашиглаагүй. Давж заалдахаас зайлсхийсэн албан тушаалтнууд ашиг сонирхлын зөрчилтэй байсан эсэхийг шалгаж өгнө үү.

ГУРАВ. Гадаадын арбитрын шийдвэрийг хүлээн зөвшөөрөх, биелүүлэх тухай 1958 оны Нью- Иоркийн конвенцид Монгол Улс 1994 онд нэгдэн орсон. Энэ конвенцийн дагуу тодорхой үндэслэлүүд байвал гадаад улсын Арбитрын аливаа шийдвэрийг биелүүлэхээс татгалзах эрхтэй байдаг. Гэтэл Монгол Улсын Засгийн газар энэ эрхээ эдлэхээс татгалзан, Стандарт банктай төлбөрийн хэмжээг багасгах, хүү торгуулийг зогсоох тухай асуудлыг хэлэлцэхийг холбогдох этгээдэд даалгаж, төлбөрийг барагдуулах болоод байна. Арбитрын шийдвэр, түүний үндэслэл болсон гэрээнүүд манай улсын шүүхэд албан ёсоор ирснээр шийдвэрийг биелүүлэх эсэхийг шийдэх ёстой. Гэтэл түүнээс өмнө төлбөрийг барагдуулах гээд байгаа нь ашиг сонирхлын зөрчлөөс үүдэлтэй байж болохоор байна. Тиймээс холбогдох албан тушаалтнуудыг шалгаж өгнө үү гэжээ.

Эх сурвалж: IKon.mn