НИЙСЛЭЛИЙН ИРГЭД ОРОН НУТАГТ ГАЗАР ӨМЧЛӨХ БОЛОМЖТОЙ

Улаанбаатар /МОНЦАМЭ/. Нийслэлийн хэмжээнд 2003-2018 оны хооронд 191 мянга 276 иргэнд гэр бүлийн хэрэгцээний зориулалтаар газар өмчлүүлсэн талаар Нийслэлийн газрын албанаас мэдээлэв.

Энэ нь нийслэлийн суурьшлын бүсийн газар өмчлөл 80 хувьтай тэнцэж буй үзүүлэлт аж. Одоогоор нийслэлийн суурьшлын бүсэд шинээр олгох газрын нөөц байхгүй бөгөөд иргэд орон нутагт газар өмчлөх бүрэн боломжтой юм. Тухайлбал, Монгол Улсын иргэн газар өмчлүүлэх тухай хуулийн дагуу нийслэлд 0.07 га буюу 700 м2, аймгийн төвд 0.35 хүртэл га буюу 3500 м2, сумын төв, тосгонд 0.5 га буюу 5000 м2, нийслэлийг орон нутагтай холбосон улсын чанартай авто замын дагуу 0.07 га буюу 700 м2 газрыг өмчлөх боломжтой байдаг.

Нийслэлийн иргэд орон нутаг газар өмчлөх хүсэлтэй бол Улаанбаатар хотод газар өмчлөөгүй тодорхойлолтыг Дүнжингарав, Мишээл, Драгон, Оргил төвд байрлах Нийслэлийн үйлчилгээний нэгдсэн төвд хандаж, авч тухай орон нутгийн газрын асуудал эрхэлсэн байгууллагад хандах юм. Тодорхойлолт авахдаа иргэний үнэмлэхтэйгээ ирнэ. Хэрвээ хүүхдийн нэр дээр тодорхойлолт авах бол ээж нь иргэний үнэмлэхтэй ирж авах юм.