АВТОМАШИНЫ УЛСЫН ДУГААРЫГ СОЛИХ ШИНЭ СТАНДАРТЫГ ИРЭХ ДОЛДУГААР САРААС ХЭРЭГЖҮҮЛНЭ

Автомашины улсын дугаарыг олон улсын стандартад нийцүүлэн өөрчлөх тухай яриа оны өмнөхөн гарч байсан ч олны эсэргүүцэлтэй тулгарч нам гүм болсон.Тухайн үедээ ХЗДХ-ийн сайд Ц.Нямдорж байр сууриа илэрхийлж, "Автомашины дугаарыг солихыг манай яам дэмжихгүй. Номер хийдэг бизнес л яваад байх шиг. Монголчуудаас цөөн тооны хүн л машинтайгаа хоёр хөрш рүү нэвтэрч байгаа. Зөвхөн үүний төлөө албадан солих тухай асуудал гаргаж болохгүй. Цагдаа нарт албадлагаар автомашины номер солих ажиллагаа явагдвал оролцож болохгүй гэсэн үүрэг өгсөн. Хэрэв номер сольж, шинэ стандарт руу шилжиж байгаа бол шинээр авах хүмүүстээ л өг.Хуучныг нь албадаж давхар бизнес хийж болохгүй" хэмээн үүрэгдэж байв.Тэгвэл энэ асуудал юу болсон талаар сураг тавилаа. Албаны эх сурвалжийн мэдээлж байгаагаар автомашины улсын дугаарыг солих шинэ стандартыг баталж, ирэх долдугаар сарын 1-нээс хэрэгжүүлэхээр төлөвлөж байгаа гэнэ. Ингэхдээ одоо явж байгаа машинуудаас эхлэхгүй. Импортоор орж ирж байгаа автомашинуудад шинэ стандартаа мөрдүүлэх юм байна. Дараа нь орон нутгийн улсын дугаартай тээврийн хэрэгслүүдийг хамруулах гэнэ. Учир нь шинээр мөрдөх стандартад засаг захиргааны харьяалалыг улсын хэмжээнд нэгдмэл болгохоор заажээ.