ЦЭЦ "ЭРДЭНЭТ ҮЙЛДВЭР" ХХК-ИЙН 49 ХУВИЙГ ТӨРИЙН МЭДЭЛД АВСАН НЬ "ҮНДСЭН ХУУЛЬ" ЗӨРЧӨӨГҮЙ ГЭЖ ҮЗЭВ

Өнөөдөр Үндсэн хуулийн Цэц дунд суудлын хуралдаанаараа "Эрдэнэт" Үйлдвэрийн 49 хувийг УИХ-ын тогтоолоор төрд авсан нь Үндс эн хууль зөрчсөн эсэхийг хэлэлцлээ. Эцэст нь "Эрдэнэт Үйлдвэр"-ийн 49 хувийн асуудлаар гаргасан шийдвэрээ ҮХЦ саяхан танилцууллаа.

"Эрдэнэт үйлдвэр" ХХК-ийн талаар Үндсэн хуулийн цэцийн дунд суудлын хуралдааны шийдвэрийг цэцийн гишүүн Д.Сугар танилцуулсан юм. Үндсэн хуулийн цэц дээрх асуудлаар хэлэлцэж "Эрдэнэт үйлдвэр" ХХК-ийн 49 хувийг төр өөртөө авах УИХ-ын 23 дугаар тогтоол нь ҮНДСЭН ХУУЛЬ ЗӨРЧӨӨГҮЙ гэж үзлээ.

ҮХЦ үүний учир нь "Монголын зэс корпораци" 49 хувийг худалдаж авахдаа Монгол Улсын хуулийг зөрчсөн тул өмчлөх эрх бүрдэх үндэслэлгүй байна хэмээн тайлбарлалаа. Талууд дунд суудлын хуралдааны дүгнэлтийг хүлээн зөвшөөрөхгүй бол Их суудлын хуралдаанаар хэлэлцүүлэх боломжтой гэж үзжээ.

УИХ-ыг төлөөлж хуралдаанд оролцсон Хууль зүйн Байнгын хорооны дарга, УИХ-ын гишүүн Ш.Раднаасэд хуралдааны дараа "Үндсэн хуулийн цэц дунд суудлаараа хэлэлцээд УИХ-ын тогтоолыг Үндсэн хууль зөрчөөгүй гэсэн шийдвэр гаргаж байна" гэдгээс илүү дэлгэрэнгүй тайлбар өгөлгүй гарч одлоо.

"Эрдэнэт үйлдвэр" ХХК-ийн 49 хувийг төрийн мэдэлд авсан тохиолдолд "Монголын зэс корпораци"-ийн ОХУ-д төлсөн төлбөрийг төлж барагдуулах үүрэгтэй гэж Цэц үзлээ.

Цэцийн энэхүү дүгнэлтийг УИХ-ын дараагийн буюу хаврын чуулганы хуралдаан эхэлсэн өдрөөс хойш 14 хоногийн дотор хэлэлцэж хариу ирүүлэхийг УИХ-д уламжилж байгаагаа мэдэгдсэн юм.