Н.ТҮВШИНБАЯР АВАРГА ДЭЛХИЙД ТЭРГҮҮЛЖЭЭ

Дэлхийн “Гэмтэлтэй ч ялалт байгуулж, медаль хүртсэн" тамирчдын нэгдүгээрт Н.Түвшинбаяр жагсчээ. Тодруулбал, Олон Улсын Олимпийн хорооноос бэртсэн хэдий ч ялалт байгуулсан бүх цаг үеийн шилдэг таван тамирчинг нэрлэсэн юм. Уг тамирчны жагсаалтын нэгдүгээрт Гавьяат тамирчин, Хөдөлмөрийн баатар, олимпийн алт, мөнгөн медальт тамирчин Найдангийн Түвшинбаярын барилдаан нэрлэгдсэн байна. Н.Түвшинбаяр 2008 оны Бээжингийн олимпоос алтан медаль хүртэж, монгол түмнийг баярлуулсан. Харин 2012 оны Лондонгийн олимпод хүнд бэртэлтэй ч олимпийн аваргын төлөө ОХУ-ын бөх Хаибулаевтай барилдан ялагдаж, мөнгөн медаль хүртсэн билээ. Энэхүү барилдааныг Олон улсын олимпийн хорооноос онцолж бүх цаг үеийн гэмтэл авсан ч ялалт байгуулж чадсан шилдэг таван тамирчны тэргүүн эгнээнд нэрлэжээ. Түүний араас Атлантагийн 1996 оны олимпод оролцсон АНУ-ын уран гимнасикчин Керри Страгийн үзүүлбэр шалгарчээ. Тэрээр финалын эхний үзүүлбэр дээр зүүн хөлөө гэмтээсэн ч хоёр дахь үзүүлбэрээ нэг хөл дээрээ амжилттай үзүүлэн алтан медаль хүртсэн аж.