ИХ УЙЛБАЛ УРТ НАСАЛНА

Америкийн Миннесота мужийн Уильям Фрэй гэдэг эрдэмтэн маш сонирхолтой туршилт явуулж нулимсны молекулын бүтцийг судалжээ. Ингэхэд нулимс нь хүний биед маш хэрэгтэй гурван чухал химийн бодисоос тогтож байгааг илрүүлжээ. Үүнд: өвдөлт намдааж, тайвшруулах, бактери ба хортой бичил биетүүдийн гадаргыг хайлуулан агшин зуур устгах нөлөө үзүүлэх, сүү үүсэх үйл явцыг өдөөж өгдөг бодис байдгийг тогтоосон байна.

Мөн энэ гурваас гадна стресс, ба харуусал, гомдох мэдрэмж төрүүлдэг бодисууд нь нулимстай хамт хүний биеэс гадагшилдаг ажээ. Нулимс нь сэтгэл санаа ариусч, бүх өвдөлт, зовлон түгшүүрийг авч одсоноор хүнийг илүү үзэсгэлэнтэй бөгөөд өөдрөг болгодог гэнэ. Дэлхийн нийтээр хийсэн судалгаанаас үзвэл эмэгтэйчүүд, эрчүүдээс тав дахин илүү уйлж нулимсаа гаргадаг бөгөөд дунджаар долоон насаар урт насалдаг байна.

Түүнчлэн бэлгийн бойжилт гүйцэхээс өмнөх шатанд хөвгүүд нь охидоос илүү олон удаа нулимс дуслуулдаг болохыг олон тооны ажиглалт, судалгаагаар тогтоосон байдаг аж. Харин уйлдаггүй байсан охид бүсгүй хүн болоод ирэхээрээ илүү уйламтгай болдог гэнэ.

Эмэгтэйчүүдийн нулимс нь эрчүүдийнхээс хагас градусаар дулаан бөгөөд илүү хөдөлгөөнтэй болохоор нулимстай нүд нь илүү тод гялалзаж харагддаг байна.

Химийн найрлагын хувьд нулимс нь цустай ойролцоо болохоор орчин үед оношлогоонд өргөн ашиглагддаг болсон ажээ. Жишээлбэл, удамшлын өвчнийг тодруулах, юунаас болж сэтгэл гутралд ороод байгаа зэрэг олон зүйлсийг тодруулахад ашигладаг гэнэ.