ДЭЛХИЙН ГУРАВДУГААР ДАЙН САНСАРТ БОЛЖ ОРОС, ХЯТАД ЯЛНА

Орос, Хятадын мэргэжилтнүүд сансарт хэрэглэх зэвсэг, технологиудаа сайжруулж, АНУ, Барууны орнуудыг ардаа орхижээ. Энэ талаар АНУ-ын Агаарын хүчний ерөнхий командлагч асан, генерал Роберт Рего Их Британийн хэвлэлд өгсөн ярилцлагадаа онцолж, сансарт дайн гарвал хэрэглэх зэвсэг, техникүүдээ хөгжүүлэх шаардлагатай гэж анхааруулсан байна. Түүний хэлж буйгаар Орос, Хятадын технологи дэлхийн хүчний тэнцвэрийг өөрчилж байгаа гэнэ.

"Орос, Хятадууд хиймэл дагуулаар халдлага үйлдлээ гэж бодоход АНУ, Европын зэвсэгт хүчин үүнд бэлэн биш байна. Бидний аюулгүй байдал өнгөрсөн үеэс илүү хэврэг боллоо" гэж Роберт Рего ярьжээ.

АНУ-ын Стратегийн командлалын тэргүүн, генерал Жон Хайтены хэлж буйгаар сансарт дайн гарлаа гэхэд түүнийг зохицуулах олон улсын хууль тогтоомж байхгүй гэнэ. Тэрээр "Орос, Хятад хоёр улс АНУ-ын батлан хамгаалах хүчнийг сулруулахын тулд маш нууц байдалд сансарт олон төрлийн цахилгаан, лазер туршиж байна. Тэд дэлхийд шинэ дэг журам байгуулахыг санаархаж байгаа юм. Бид ийм явдал болохыг хэзээ ч зөвшөөрөхгүй" гэж мэдэгдсэн юм.

2007 онд Хятадын мэргэжилтнүүд сансарын тойрог замд хиймэл дагуулыг тэслэх чадвартай лазер зэвсэг туршжээ. Энэ зэвсэг нь өндөр хурдтай, бага дуу чимээ гаргадаг бөгөөд цэргийн зориулалттай нисэгчгүй онгоцыг буудан сөнөөх чадалтай гэж Хятадын инженер, физикийн академийн эрдэмтэд мэдэгдсэн байна. Харин Оросын арми физикийн шинэ зарчим дээр тулгуурласан, дэвшилтэт лазер зэвсгүүдийг хэрэглээнд нэвтрүүлжээ.