"МОНГОЛ ЗЭС КОРПОРАЦИ" ДЭЭД ШҮҮХ ДЭЭР ЯЛЛАА

Улсын дээд шүүх өнөөдөр "Монголиан коппер корпорейшн" ХХК-ийн нэхэмжлэлтэй, Төрийн өмчийн бодлого, зохицуулалтын газар, "Эрдэнэт үйлдвэр" ХХК, Оюуны өмч, Улсын бүртгэлийн ерөнхий газруудад холбогдох иргэний хэргийг хариуцагчийн төлөөлөгчийн гаргасан гомдлоор хянан хэлэлцлээ.

Монголын зэс корпораци нь Эрдэнэт үйлдвэрийн ОХУ-ын эзэмшил болох 49 хувийг худалдаж авсан бөгөөд үүнийг нь Засгийн газрын тогтоолоор хүчингүй болгосон. Улмаар Оюуны өмч, Улсын бүртгэлийн ерөнхий газар тус компанийн нэр дээр бүртгэлтэй 49 хувийг Засгийн газар буюу Төрийн өмчийн бодлого, зохицуулалтын газрын нэр дээр бүртгэсэн.

Энэхүү бүртгэл нь зөв гэх анхан болон давж заалдах шатны шүүхийн шийдвэр хуульд нийцээгүй байна гэж Дээд шүүх үзлээ. Тодруулбал, Сүхбаатар дүүргийн Иргэний хэргийн анхан шатны шүүхийн 2017 оны долдугаар сарын 05-ны өдрийн 181/ШШ2017/01956 дугаар шийдвэртэй, Нийслэлийн Иргэний хэргийн давж заалдах шатны шүүхийн 2017 оны есдүгээр сарын 20-ны өдрийн 2092 дугаар магадлалаар нэхэмжлэгчийн шаардлагыг хангахгүй орхиж байсан юм.

Нэхэмжлэл гаргасан Монгол зэс корпорацийн нэхэмжлэлийг шүүх хангаж, тэд шүүх дээр ялсан байна.