ЯПОНЫ НИЙТИЙН ТЭЭВЭР 20 СЕКУНД ЗӨРЖ, УУЧЛАЛТ ГУЙВ

Японы нийтийн тээвэр цагийг ягштал баримталж, хэрэглэгчдэд дээд зэргээр үйлчилдэг болохыг "Tsukuba Express" компани олон нийтээс уучлалт гуйсан явдал харуулав. Тус компанийн хурдан галт тэрэг Токиогийн хойд хэсэгт орших Минами Нагарейма зогсоолоос өглөөний 9.44.40-д буюу товлосон хугацаанаас 20 секундийн өмнө хөдөлжээ.

Үүний дараахан Төмөр замын үйлчилгээний газраас "Tsukuba Express" галт тэрэгний үйл ажиллагаа хариуцсан багийг явах цагаа нарийн шалгаагүй хэмээн буруутгасан байна. Хэдийгээр энэ явдалтай холбоотойгоор ямар нэгэн гомдол санал ирээгүй ч компанийн удирдлагууд "Үйлчлүүлэгчдийнхээ ая тухыг алдагдуулсанд гүнээ хүлцэл өчье" гэж мэдэгдэв.

Тэд зорчигчдыг 45 минутын дотор Токиогийн Акихабарагаас Цукабу зогсоол хүртэлх 54 км газар хүргэж өгч үйлчилдэг бөгөөд 4 минут тутамд нэг галт тэрэг хөдөлдөг байна. Энэхүү үйлчилгээгээр өдөрт 230 мянган хүн зорчдог ажээ.

Японы төмөр замын систем цаг нарийн баримталдаг, найдвартай гэдгээрээ дэлхийд алдартай. Өдөрт хэдэн сая зорчигч ажилдаа хоцрохгүйн тулд зогсоол дээр ирэх цагаа хуваарийн дагуу сайтар төлөвлөдөг байна.