Л.ПҮРЭВСҮРЭН: 21 ТЭРБУМ ТӨГРӨГӨӨС АСЕМ ЗОХИОН БАЙГУУЛАХАД 19 ТЭРБУМ ТӨГРӨГИЙГ ЗАРЦУУЛСАН

АСЕМ-ын хурлын үеэр Гадаад харилцааны сайдын албыг хашиж байсан Purevsuren Lundeg өөрийн фэйсбүүк хуудасдаа тухайн үед гаргасан зардлын талаар ийн бичсэн байна...

100 жилд нэг л удаа зохион байгуулж чадах, олон улсын хэмжээний том хурлыг Монгол Улс, Гадаад харилцааны яам амжилттай зохион байгуулж чадсан билээ...

Сүүлийн үед АСЕМ-ийн хурлыг ихээхэн зардал гаргаж хийсэн мэтээр олон хүн ор үндэсгүй тоог ярих боллоо.
Гадаад хэргийн сайдын хувьд АСЕМ-ийн бэлтгэл ажлыг хангаж, хариуцан хэрэгжүүлсэн тул зарим тоо баримт, мэдээллийг олон нийтэд өгөх нь зүйтэй санагдлаа.
АСЕМ-ийн бэлтгэл ажлыг хангахад зориулан 2015 онд Гадаад хэргийн сайдын багцанд 2,5 тэрбум төгрөгийг УИХ-аар баталж өгсөн. 2016 оны 3-7 дугаар сард Монгол Улсад зохион байгуулсан АСЕМ-ийн нийт 10 төрлийн хурлыг зохион байгуулах зардалд зориулан 2016 оны төсөвт УИХ-аар Гадаад хэргийн сайдын төсөвт нийт 21 тэрбум төгрөгийн төсвийг баталж өгсөн. АСЕМ-ийн хурлыг зохион байгуулж, бүх тооцоог дуусган 2016 оны 7 дугаар сарын сүүлчээр дараагийн сайдад ажлаа хүлээлгэн өгсөн. Тэр үед 21 тэрбум төгрөгөөс АСЕМ зохион байгуулахад 19 тэрбум төгрөгийг зарцуулж, 2 тэрбумийн үлдэгдэлийг хүлээлгэж өгсөн. Зарцуулалтын задаргаа, бүх тайлангууд тухайн үед шилэн дансны хуулийн дагуу ГХЯ-ны цахим хуудсанд тавигдаж байсан болно.