ХУУЧНЫ БАРИЛГУУДАД АНХААРАЛ ХАНДУУЛАХ ХЭРЭГТЭЙГ ДӨРВӨН ХҮНИЙ АМЬ НАС САНУУЛЛАА

Өнгөрсөн баасан гаригт барилгын гадна фасадны ажил хийж байсан 4 иргэн осолдож харамсалтай нь амиа алдсан хэрэг гарсан. Тэгвэл энэ хэрэгт мэргэжлийн хяналтын байгууллагын дүгнэлт гарч тус дөрвөн иргэн техникийн шаардлага хангаагүй дүүжин өргүүр ашиглаж, мөн хамгаалалтын бүс зүүгээгүй байсан байна.

Баянзүрх дүүргийн V хороо буюу кино үйлдвэрээс хойш 204 дүгээр байрны найман давхраас барилгын пасад хийж байсан дөрвөн иргэн унаж амь насаа алдсан харамсалтай хэрэг өнгөрсөн долоо хоногийн баасан гаригт гарсан. Цагдаа онцгой байдлын байгууллагын анхан шатны дүгнэлтээр дөрвөн иргэний зогсож байсан барилгын дүүжин шат дундуураа хугарсан байж магадгүй гэсэн дүгнэлт байсан юм. Тэгвэл мэргэжлийн хяналтын байгууллагын дүгнэлт гарч амь насаа алдсан дөрвөн иргэн барилгын пасадын ажил гүйцэтгэж байхдаа техникийн шаардлага хангахгүй дүүжин өргүүр ашиглаж байсан мөн хамгаалалтын бүс зүүгээгүй байсан байна.

Мэргэжлийн байгууллагаас дүүжин өргүүр ашиглах зөвшөөрлийг иргэн бус зөвхөн аж ахуй нэгжид олгодог байна. Энэд нэг асуудал сөхөгдөж байгаа нь барилгын дулаан алдалтаас үүдэж иргэд гадна ханандаа дулаалга буюу пасадны ажил хийлгүүлдэг. Аж ахуй нэгжээр хийлгүүлэх гэхээр үнэ мөнгө нь өндөр байдаг учраас хувь хүмүүсээр хийлгэх тохиолдол их байдаг байна.

Хуучны барилгууд ийнхүү дулаан алдаж айлууд гадна дулаалга их хийлгэх болсон. Энэ салбар яам, холбогдох байгууллагууд нэгэнтээ анхаарлаа хандуулж нэгдсэн байдлаар шийдэх цаг нь иржээ гэдэг нь 4-н хүний амь насаа алдсан энэ хэргээс харагдаж байна.