Д.Амарбаясгалан: Би улс төрийн карьераа бодоод хулчийж суудаг хүн биш

МАН-ын Бага хурал үргэлжилж байна. Намын даргад нэр дэвшигч Д.Амарбаясгалан, Г.Занданшатар нар илтгэлээ танилцуулж дууслаа. Үргэлжлүүлэн асуулт хариулт үргэлжилж байгаа юм. Ерөнхий сайд Г.Занданшатар, "Ард түмэн талцал хуваагдал, нэг асуудлыг нөгөө асуудлаар дарж, хоосон дайсан, хиймэл бэрхшээл үүсгэдэг төр удирдах арга барилаас залхан цөхөрчээ" гэв. 

УИХ-ын дарга Д.Амарбаясгалан, “Би улс төрийн карьераа бодоод хулчийж суудаг хүн биш. МАН-ын Ерөнхий нарийн бичгийн даргаар 8 жил ажиллаж, намаа бодлогын судалгаатай, нээлттэй, дэвшилтэт, цахим болгож, 3 дараалсан ялалт авчирсан.

Намын гишүүдийнхээ итгэлийг алдахгүйн төлөө, хэнийг ч ялгалгүй бүх хүчээ дайчилж ажилласан. Би дарга болох гэж зүтгээд байдаггүй. Өнгөрсөн хугацаанд надад нэр дэвших боломж зөндөө байсан ч намаа илүү институцийн түвшинд хүргэхэд анхаарч ажиллаж ирсэн. Баруун бүсдээ ч өөрийгөө сурталчлахаас илүү намын бодлогоо ярьж УИХ-д сонгогдсон" гэв.