С.Мягмарсүрэн: Шуудайнд яваад ирэх 20 минут хүрэхгүй хугацаанд хүү маань алга болчихсон

Хөвсгөл аймгийн Тариалан сумын нутагт хоёр настай хүү сураггүй алга болсноос хойш таван өдөр өнгөрч байна. Хүү алга болохдоо таван сартай дүүгийн хамт машиндаа үлдсэн. Түүний ээж С.Мягмарсүрэн Хөвсгөл аймгийн хэвлэлд өнөөдөр(2025.09.21) ярилцлага өгсөн юм. 

Тэрбээр, "Манай гэр бүл Тариалан суманд дөрөв дэх жилдээ өвөлжих гэж байна. Тухайн өдөр саахалт айлынхаа хүмүүстэй мод бэлтгэхээр ярилцаж, тохиролцоод аав, ах маань хоёр ачааны машинаа унаад явсан. Нөхөр бид хоёр хоёр хүүхдээ аваад дөрүүлээ ирэхэд 14:00 цаг өнгөрч байсан. Хоёр хүүхэд маань ирэхэд унтаж байсан болохоор ойр орчмоор үүс бөөгнүүлэхээр гараад, түүлэй ачсан машинтай хэдэд  шуудай байгаа юм болов уу гээд очсон. 200-гаад метрийн зайд байсан тэдэн дээр очоо, шуудай байхгүй, ажиллахгүй хөрөөг машиндаа авч очоод тавьчих гэхээр нь аваад явсан. Тэр хооронд хамгийн ихдээ 20 минут л болсон байх. Гэтэл ирэхэд хүүхэд маань байхгүй байсан. Тэгээд шууд аав руу нь орилж хэлээд энэ хавиар хайсан. Утсаар ярих талаарх бодол ерөөсөө орж ирээгүй. Аав нь ирээд хүмүүс рүү ярь, гэгээ тасарлаа гэхэд л ухаан орсон. Тэр оройноос одоог хүртэл эрэн хайж байна. Ямар ч сураг чимээ гарахгүй, ул мөр, хувцас нь ч олдохгүй байна. Надад амьд байгаа байх гэдэг мэдрэмж төрөөд байгаа. 

Машиндаа эргээд ирэхэд хаалга хаалттай байсан. Гарч явахдаа жолооч талын хаалгаар эсвэл арынх нь хаалгаар л буусан байх. Хажуу талд нь дүү нь унтаж байсан.  Уг нь манай хүү дүүгээ орхиж машинаасаа гарч явдаггүй. Шээс нь хүрээд буусан байлаа гэхэд машинаасаа холдож гүйдэггүй. Үнэхээр гайхаж байна. Яг энэ хавьд байгаа юм шиг холдоогүй юм шиг мэдрэмж төрөөд байсан. Энэ тэнд уйлж байгаа даа гэж бодоод чимээ сонсоно гэхэд ямар ч чимээ гараагүй. Уг нь бол гэртээ дүүтэйгээ үлддэг, сум ороод дэлгүүрийн гадна машиндаа суугаад үлддэг байсан. Нөхөр, аав, ахтайгаа хайж байгаад 16:00 цаг өнгөрөөд гэгээтэй байхад хүмүүстэй хамт самнаж хайсан. Тэр орой бол дуу чимээ маш их гаргаж хайсан. Миний хүү сайн ярьдаг, хөл чангатай" гэсэн юм.