Тэд эрсдэх ёсгүй.....

Цагдаагийн алба хаагчид өдөр бүр олон нийтийн аюулгүй байдал, хэв журмыг сахиулахын төлөө эрсдэлийг үл хайхарлан үүргээ гүйцэтгэдэг. Гэвч зарим тохиолдолд ааг омгоо барьж ядсан, согтуурсан хөлчүүрхсэн нэгний үйлдлээс болж алба хаагчид эрүүл мэндээрээ хохирох тохиолдлууд цөөнгүй байна.

Өнгөрсөн 3 жилийн байдлаар 665 алба хаагч албан үүргээ гүйцэтгэж байхдаа гэмт хэрэгт өртөж хохирсон байна. Нийт гэмт хэрэгт өртөж хохирсон алба хаагчдын 12 нь эмэгтэй алба хаагч байна.

Дээрх гэмт хэрэгт өртөж хохирсон алба хаагчдаас 11 алба хаагчийн биед хүндэвтэр, 207 алба хаагчийн биед хөнгөн гэмтэл шүүх эмнэлгийн шинжээчийн дүгнэлтээр тогтоогдсон байна.

Албан үүргээ гүйцэтгэж байхдаа халдлагад өртөж биедээ гэмтэл авсан дийлэнх алба хаагчид нүүр болон толгой, хүзүү хэсэгтээ гэмтэл авсан байгаа нь тэдний ажлын онцлог нь өдөр тутас эрсдэл нөхцөл байдлуудтай нүүр тулж ажилладаг гэдгийг харуулж байна.

Судалгаанаас харахад алба хаагч албан үүргээ гүйцэтгэж байхдаа гэмт хэрэгт өртөж хохирч байгаа тохиолдол жил тутам 7-21 нэгжээр өсөж байна.

Алба хаагчид ихэвчлэн гудамж талбайд гэмт хэрэг, зөрчлийн дуудлага мэдээлэлд очиж ажиллах, замын хөдөлгөөний зохицуулалтыг хийх, согтуурсан танхайрсан этгээдийн үйлдлийг таслан зогсоох, сэжигтэй этгээдийг баривчлах үед халдлагад өртөж, гэмт хэргийн хохирогч болжээ.  

Хуулиар хүлээсэн чиг үүргийнхээ дагуу үүргээ гүйцэтгэж байсан алба хаагчдын биед халдах, хувцас, техник хэрэгслийг нь устгаж, гэмтээсэн үйлдлээс 501 гэмт хэргийн шинжтэй үйлдлийг иргэд согтуугаар үйлдсэн байна.

Түүнчлэн алба хаагчийн хууль ёсны шаардлагыг эсэргүүцэж, биед халдаж гэмтэл учруулсан иргэдийн 93 буюу 13.9 хувийг эмэгтэйчүүд эзэлж байна.

Өнгөрсөн 3 жилийн байдлаар алба хаагчийг албан үүргээ биелүүлэхтэй нь холбогдуулан хүч хэрэглэсэн, хүч хэрэглэхээр заналхийлж эсэргүүцсэн 450 иргэний үйлдлийг шалгаж шүүхэд шилжүүлсэн байна.

Дээрх шүүхэд шилжүүлсэн хэрэгт алба хаагчийн энгэрийн хяналтын камерын бичлэгийг шүүхээс нотлох баримтад тооцож хэргийг шийдвэрлэсэн байна.

Төр түмнийхээ төлөө хоёргүй сэтгэлээр өргөсөн тангарагтаа үнэнчээр зүтгэж байгаа та бидэнтэй адил аавын хүү ээжийн охиныг ажил үүргээ хэвийн гүйцэтгэхэд нь саад учруулж болох ч бие мах бодид нь бүү халдаарай

Учир нь эдгээр хүмүүс бидний л адил хайрлаж өсгөсөн хүний хүүхдүүд, эрүүл саруул яваасай гэж залбирдаг ижий аав, хань ижилтэй хүмүүс шүү дээ 

Цагдаагийн алба хаагчид бидний төлөө эрсдэл үүрч яваа хүмүүс гэдгийг ухамсарлаж, тэдний ажилд саад учруулах бус харин дэмжиж, хамтран ажиллах нь нийгмийн нийтлэг эрх ашгийн төлөө хийх хамгийн том хувь нэмэр юм шүү.

Хэрэв Төрийн албан хаагчийг хууль сахиулах чиг үүргийг хэрэгжүүлэх явцад тавьсан хууль ёсны шаардлагыг хүн, хуулийн этгээд биелүүлээгүй, эсхүл биелүүлэхгүй байхыг уриалсан, үйл ажиллагаанд нь саад учруулсан, хүч хэрэглэхгүйгээр эсэргүүцсэн, доромжилсон үйлдэлд  Зөрчлийн тухай хуулийн 15.2 дугаар зүйл “Төрийн албан тушаалтны шийдвэрийг үл биелүүлэх, үйл ажиллагаанд нь саад учруулах” зөрчилд заасны дагуу хүнийг хоёр зуун тавин нэгжтэй тэнцэх хэмжээний төгрөгөөр, хуулийн этгээдийг хоёр мянга таван зуун нэгжтэй тэнцэх хэмжээний төгрөгөөр торгоно” гэж хуульчилсан байдаг.

Харин хууль сахиулагчийг албан үүргээ биелүүлэхтэй нь холбогдуулан хүч  хэрэглэсэн, хүч хэрэглэхээр заналхийлж эсэргүүцсэн үйлдэлд Эрүүгийн хуулийн 23.1 дүгээр зүйл “Хууль сахиулагчийг эсэргүүцэх” гэмт хэрэгт заасны дагуу эрүүгийн хариуцлага оногдуулах хуулийн зохицуулалттай байдаг.

Иймд иргэн бүр хуулиа дээдэлж, цагдаагийн алба хаагчийн хууль ёсны шаардлагыг биелүүлэх нь зөвхөн хуулиар тогтоосон үүрэг төдийгүй таны бидний бусдын амь нас, аюулгүй байдлыг хамгаалах баталгаа юм.