БНСУ-ын жуулчдад зориулсан эмнэлгийн яаралтай тусламжийн үйлчилгээг нэвтрүүллээ

Солонгост сургууль төгсөгчдийн холбоо(MAGIKO) Хан-Уул дүүргийн Эко нэгдсэн эмнэлэг, “Улта Тур” ХХК-тай хамтран Монгол Улсад аялж буй БНСУ-ын болон бусад орны жуулчдад зориулсан эмнэлгийн яаралтай тусламжийн үйлчилгээг албан ёсоор нэвтрүүлэн эхлүүллээ.

Монгол Улсад зорчиж буй жуулчид аяллын явцад осол, гэмтэл, өвчлөл зэрэг эрсдэлтэй нөхцөл байдалд өртөх тохиолдолд эмнэлгийн шаардлагатай тусламж, үйлчилгээ авахад хүндрэл үүсдэг. Иймд дээрх байгууллагууд хамтран тухайн нөхцөл байдалд түргэн шуурхай, хүртээмжтэй, хямд өртөгтэй эмнэлгийн яаралтай тусламжийн үйлчилгээ үзүүлэх, аль ч газраас богино хугацаанд хүрч очих боломжтой системийг хэрэгжүүлж эхлээд байна. Тус үйлчилгээ нь зөвхөн БНСУ-ын жуулчдад бус, Улаанбаатар хотод аялж буй бусад гадаадын иргэдэд ч нээлттэй бөгөөд дараах тусламж, үйлчилгээг үзүүлэх юм.

• 24 цагийн турш тасралтгүй үйлчилгээ авах боломж

• Түргэн тусламжийн дуудлагаар очиж газар дээр нь яаралтай тусламж үзүүлэх, шаардлагатай тохиолдолд эмнэлэгт хүргэх

• Яаралтай түргэн тусламжийн автомашинаар очиж авах

• Амь насыг аврах анхан шатны тусламж, гэмтлийн яаралтай тусламж, шаардлагатай оношилгоо, эмчилгээ • Орчуулагчийн үйлчилгээ, эрүүл мэндийн зөвлөгөө, дэмжлэг

• Хэрэв шаардлагатай бол эмнэлэгт хэвтүүлэн эмчлэх үйлчилгээ

Холбоо барих мэдээлэл: • Яаралтай тусламжийн утас: +976-70049255 (24 цагийн турш дуудлага хүлээн авна) • Орчуулагчтай холбогдох утас: +976-9800-2163 (солонгос хэл дээр) Цаашдын үйл ажиллагааны төлөвлөгөө: Тус хамтарсан санаачилгын хүрээнд цаашид: • Улаанбаатар хотын бусад дүүргийн эмнэлгүүд болон аялал жуулчлалын байгууллагуудтай хамтран ажиллах, • Үйлчилгээний чанар, үр дүнг улирал тутам үнэлэх, • Жуулчдад зориулсан мэдээлэл, сурталчилгааг олон сувгаар түгээх, • Сурталчилгааны материалуудыг бэлтгэн хэвлэмэл болон гар утасны аппликэйшн хэлбэрээр гаргах, • Гадаад жуулчдад тусгайлан зориулсан, Солонгост сургууль төгсөгчдийн холбооны нэрэмжит тасгийг байгуулах чиглэлээр үе шаттайгаар ажиллахаар төлөвлөж байна.