Бэлчээрийн даац 65 хувиар хэтэрсэн байна

Цаг уур орчны шинжилгээний газраас 2025-2026 оны өвөл, хаврын бэлчээрийн даацыг тодорхойлон гаргажээ. Ингэхдээ баг бүрийн бэлчээрийн ургац, малын тоо, бэлчээрийн талбайн хэмжээ, бэлчээр ашиглах хугацаа зэрэг мэдээлэлд үндэслэсэн байна. 

Зуншлагын байдал энэ сарын 20-ны байдлаар нийт нутгийн 54 хувьд хэвийн, нутгийн 46 хувьд гантай болон гандуу байв. Бэлчээрийн даацыг тооцоолж гаргасан дүнгээс үзвэл нийт нутгийн 16.1 хувь бэлчээрийн нөөцтэй бол 18.5 хувьд нь бэлчээр хүрэлцээтэй байгаа аж. Харин нийт нутгийн 30.7 хувьд даац 1-3 дахин хэтэрсэн 16.3 хувьд нь даац 3-5 дахин хэтэрсэн бол 18.4 хувь нь даац олон дахин хэтэрсэн байна.

Өөрөөр хэлбэл ирэх өвөл-хаврын бэлчээрийн даац нутгийн 35 хувьд хүрэлцээтэй, харин 65 хувьд хэтэрч гарсан нь өмнөх жилээс 30 гаруй хувиар давсан үзүүлэлт юм.

Аймгийн дүнгээр авч үзвэл Баян-Өлгий, Увс, Ховдын ихэнх, Баянхонгор, Говь-Алтай, Дундговь, Дорноговь, Өмнөговь, Өвөрхангай аймгийн зарим сумдын нутгаар даац олон дахин хэтэрч гарсан байна.

Зуны турш гандуу болон гантай байсан бүс нутгуудад бэлчээрийн нөөц, хүрэлцээ муу, мал хангалттай тарга тэвээрэг авч чадаагүй тул эдгээр бүс нутгууд өвс, хадланг бэлчээрийн нөөц бүхий нутгаас бэлтгэж, нэмэгдэл тэжээлийг нөөцлөх, отор нүүдлийн зохион байгуулалт хийх, малаа эдийн засгийн эргэлтэд оруулж тоог бууруулах зэрэг арга хэмжээг эртнээс авч хэрэгжүүлэн өвөлжилт хаваржилтад бэлтгэх шаардлагатайг анхаарууллаа.