Төрд хохирол учруулсан иргэнд ял оноожээ

Мэргэжил сургалт үйлдвэрийн төвд суралцдаггүй 18 иргэнийг суралцсан мэтээр цахим системд бүртгэж, төрд 22 сая төгрөгийн хохирол учруулсан албан тушаалтанд 1 жил 6 сарын хорих ял оноожээ.

Баян-Өлгий аймаг дахь Мэргэжил сургалт үйлдвэрийн төвийн захирлаар ажиллаж байхдаа иргэн И.Жанболат хүний нөөц гадаад харилцаа хариуцсан мэргэжилтэн Е.Айнур, сургалтын арга зүйч Е.Керим нартай бүлэглэн 2019-2020-оны хичээлийн жилд Мэргэжил сургалт үйлдвэрийн төвд суралцаагүй  нэр бүхий 18 иргэнийг суралцсан мэтээр цахим системд бүртгэж албан үүрэг бүрэн эрх, албан тушаалын байдлаа урвуулан ашиглаж, Мэргэжил сургалт үйлдвэрийн төвд суралцагчдад олгодог тэтгэлгийг хууль бусаар олгох нөхцөлийг бүрдүүлж, төрд 22 сая төгрөгийн хохирол учруулсан гэмт хэрэгт холбогджээ.

Анхан шатны шүүх И.Жанболат, Е.Керим, Е.Айнур нарыг нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж хийх ёсгүй үйлдэл хийж бусдад давуу байдал бий болгосон гэмт хэргийг бүлэглэж үйлдсэн гэм буруутайд тус тус тооцсон байна. Улмаар И.Жанболатыг нийтийн албанд томилогдох эрхийг 5 жилийн хугацаагаар хасаж, 1 жил 6 сар нээлттэй хорих ангид ял эдлүүлэх, Е.Айнур нийтийн албанд томилогдох эрхийг 4 жилийн хугацаагаар хасаж 14 сая төгрөгөөр торгох, Е.Керим, нийтийн албанд томилогдог эрхийг 3 жилийн хугацаагаар хасаж 11 сая төгрөгөөр торгох шийтгэл оногдуулжээ.

Давж заалдах шатны шүүх Е.Керим-н үйлдэл тогтоогдоогүй учир гэмт хэргийн шинжгүй үндэслэлээр цагаатгаж Е.Керим-д холбогдох хэргийг хэрэгсэхгүй болгосон байна. Харин И.Жанболат, Е.Айнур нарыг нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж бусдад давуу байдал бий болгосон үйлдэл нь хэрэгт авагдсан нотлох баримтуудаар хангалттай тогтоогджээ. Тиймээс анхан шатны шүүхийн оногдуулсан ял тэдгээрийн үйлдэлд тохирсон, эрүүгийн хуулийн ял оногдуулах нийтлэг зарчимд нийцсэн, гэх дүгнэлтийг хийж шийтгэх тогтоолын тогтоох хэсэгт зарим өөрчлөлт оруулж, шүүгдэгч И.Жанболат, Е.Айнур нарын давж заалдах гомдлыг хэрэгсэхгүй болгож шийдвэрлэсэн байна.