Орон сууцны залилангийн хэрэгт 18-35 насныхан холбогдож байна

Цагдаагийн байгууллагаас өнөөдөр /2025.08.26/ цаг үеийн асуудлаар сэрэмжлүүлэг мэдээллийг өглөө.

ЦЕГ-ын Урьдчилан сэргийлэх албаны ахлах мэргэжилтэн Э.Энхзаяа "Энэ оны эхний найман сарын байдлаар цагдаагийн байгууллагад бага насны хүүхэд өндрөөс буюу цонх, тагтнаас таван хүүхэд унаж амь насаа алдсан хэрэг бүртгэгдсэн. Тухайлбал, өнгөрсөн долоо хоногт нийслэлийн Баянзүрх, Сүхбаатар дүүргийн нутаг дэвсгэрт хоёр хүүхэд өндрөөс унаж амь насаа алдсан харамсалтай хэрэг бүртгэгдсэн. Цагдаагийн байгууллагад ирсэн дуудлагын дагуу хяналт шалгалт хийхэд дийлэнх хувь нь бага насны хүүхэд эцэг эхийн хараа хяналтгүй, гаднаасаа цоожлогдсон үедээ цонхоор харах, тагтан дээр байх үедээ өндрөөс унаж амь насаа алдсан хэрэг бүртгэгдсэн. Мөн хичээлийн шинэ жил эхэлж байгаа энэ үед орон сууц түрээслэнэ гэх зарыг цахим орчинд байршуулж иргэдийг залилан мэхэлж байна. Эдгээр этгээдүүд иргэдийн орон сууц зарна, түрээслэнэ гэх мэдээллийг өөрийн зүйл шиг байршуулж залилан үйлдэж байна. Үүнээс гадна гэрээ байгуулахгүй бол өөр хүнд түрээсэлнэ гэх мэтээр иргэдийг шамдуулж, гарцаагүй байдалд оруулж залилан хийж байна. Иймд иргэд баталгаатай зарын групп болон эх сурвалжтай холбогдож байр түрээслэх шаардлагатай. Орон сууцны үл хөдлөхийн гэрчилгээг эзэмшигчтэй тулгаж харах шаардлагатай юм. Тэгж байж энэ төрлийн залилах гэмт хэргийн хохирогч болохоос урьдчилан сэргийлэх хэрэгтэй. Цагдаагийн байгууллагаас энэ төрлийн гэмт хэргээс урьдчилан сэргийлэх чиглэлээр өнгөрсөн долоо хоногт нийт 143 орчим зар мэдээлэл байршуулсныг шалгасан. Энэхүү мэдээлэлд дүн шинжилгээ хийхэд нийт зарын 30 гаруй хувь иргэдийг төөрөгдүүлж, залилах шинжтэй гэмт хэрэг тогтоогдож шалгах ажил үргэлжилж байна. Иргэдийг залилж буй этгээд насны хувьд харьцангуй адилгүй бөгөөд 18-35 насны залуус энэ төрлийн хэргийг үйлдэж байна" гэлээ.