Улаанбурхан өвчнөөр 14 нь хүнд, гурав нь нэн хүнд байна

Халдварт өвчин судлалын үндэсний төвөөс гаргасан мэдээллээр, 2025 оны долдугаар сарын 22-ны байдлаар улаанбурхан өвчний нийт батлагдсан тохиолдол 12620 болсон байна. 

Харин эмчилгээ хийлгэж эдгэрсэн хүний тоо 12152 бол гэрийн ажиглалтад 162 хүн байна. Эмнэлэгт 268 хүн хэвтэн эмчлүүлж байгаагийн 14 нь хүнд, гурав нь нэн хүнд байгаа ажээ. Нийт өвчлөгчдийн дийлэнх нь буюу 4858 тохиолдол 10–14 насныхан байгаа бол 0–4 насны 2720, 15–19 насны 1601 хүүхэд улаанбурханаар өвчилсөн байна. 

Улаанбурхан өвчин нь халдварлалт өндөртэй ч вакцинаар сэргийлэгдэх боломжтой халдварт өвчин юм. Тус өвчнөөс урьдчилан сэргийлэх хамгийн үр дүнтэй арга бол хоёр тун вакцин тул иргэдийг дархлаажуулалтад хамрагдахыг албаныхан уриалж байна.