Үер, гол усны ослоос урьдчилан сэргийлэхийг анхааруулж байна

Энэ оны эхний  долоон сарын байдлаар 37 хүн гол усанд эндсэний 10 нь насанд хүрээгүй хүүхэд амиа алдсан харамсалтай тохиолдол бүртгэгджээ. Харин өнгөрсөн онд улсын хэмжээнд 102 хүн гол усанд живж амиа алдсан байна. Үүнээс 17 нь насанд хүрээгүй хүүхэд байжээ.

Цагдаагийн байгууллагаас иргэд, олон нийтийн аюулгүй байдлыг хангах, үер, гол усны ослоос урьдчилан сэргийлэх ажлыг улсын хэмжээнд эрчимжүүлэн ажиллаж байна.

Тухайлбал гол, усны ослоос урьдчилан сэргийлэх зорилгоор томоохон гол, нуурын эрэг дагуу завьт эргүүл, морин эргүүл, явган эргүүлийн үүрэг гүйцэтгэн ажиллаж байна. Гол, усны осол нь иргэдийн анхаарал, болгоомжгүй үйлдэл болоод бага насны хүүхдийг хараа, хяналтгүй орхисон зэрэг нийтлэг шалтгаанаас үүдэж байгаа тул иргэд  сонор, сэрэмжээ дээшлүүлэн, бага насны хүүхдийг хараа хяналтгүй голын эрэг дагуу тоглуулахгүй, зориулалтын бус хийлдэг завь ашиглахгүй байж, мэргэжлийн байгууллагаас өгч байгаа заавар, зөвлөмжийг дагаж мөрдөхийг цагдаагийн байгууллагаас сэрэмжлүүллээ.