“Этүгэн Ирвэсүүд” клубын охид олон улсын тэмцээнээс хүрэл медаль хүртлээ

“Этүгэн Ирвэсүүд” клубын охид олон улсын тэмцээнээс хүрэл медаль хүртлээ. Энэ оны 6-р сарын 13-15-ны өдрүүдэд Испанийн эзэнт улсад зохион байгуулагдсан Euro Youth Basketball Cup олон улсын тэмцээнд Монгол Улсын “Этүгэн Ирвэсүүд” клубын 16 насны өсвөрийн охидын шигшээ баг амжилттай оролцож, хүрэл медалийн эзэд боллоо.

Тус тэмцээнд Америк болон Европ тивийн нийт 28 орны багууд оролцсон бөгөөд өндөр зэрэглэлийн, өрсөлдөөнтэй тоглолтууд болсон байна. Харин Ази тивээс оролцсон цорын ганц төлөөлөгч нь манай Монголын баг байсан юм.

Этүгэн Ирвэсүүдийн охид ердөө 8 тамирчинтай оролцож, олон хүнд тоглолтуудыг сэтгэл зүрхээрээ туулан, урам зоригтойгоор хичээнгүйлэн тоглосны үр дүнд тус тэмцээнээс хүрэл медаль хүртэж, Монголын нэрийг олон улсын тавцанд амжилттай дуурсгалаа.

Түүнчлэн тус тэмцээнд ур чадвараа гайхуулсан тоглогч Б.Анунгоо “Тэгш тоглогч”-оор шалгарсан байна.

Энэхүү амжилт нь зөвхөн тамирчдын талбай дээрх хөдөлмөрөөс гадна:
• Эцэг эхийн тууштай дэмжлэг,
• Клубын удирдлагуудын итгэл, боломж,
• Тамирчдын тэвчээр, зүтгэл, зоригийн нэгдэл байсныг тэмдэглэх нь зүйтэй.

Этүгэн Ирвэсүүд клубын удирдлагууд, эцэг эхчүүдэд болон Монголын охиддоо баяр хүргэе. Монгол охид авьяас чадвараа дэлхийн тавцанд батлан харууллаа.