Соёлжуулах нэрээр солонгос руу бүх мөнгөө урсгаж эхэллээ

Урин дулааны улирал ирж, олон шоу тоглолт зохион байгуулагдаж байгаагийн нэг нь энэ сарын бямба гараг буюу зургаадугаар сарын 21-нд болох БНСУ-ын BIGBANG-ийн гол дуучин TAEYANG-ы оролцох Super Concert. 

Мэдээж түүний хувьд анх удаа Монголд ирж байгаа учраас үзэгч, фенүүд нь тэсэн ядан хүлээж буй нь тодорхой. 
Гэтэл түүний тоглолтын үзэгчид шоуны үеэр уух шар айргийн сонголтоо өөрсдөө ч хийж чадахгүйд хүрчээ. Тэнд зөвхөн Солонгосын “Терра” гэх шар айраг худалдаалах юм байна. 
Бүр 300 ширхэг худалдаалагдах VIP сонголтын тасалбарыг 750.000 төгрөгөөр худалдаж авсан ч ялгаагүй, шар айргийн сонголтгүй. Уг нь тоглолтын зохион байгуулалтыг “EVANDIS entertainment” хариуцаж байгаа аж. 
Тэгсэн ч Монгол залуус Солонгос дуучны тололтыг үзэхийн тулд тухайн улсын шар айргийг ууж, эгээ л солонгосоор ярь гэдэг шаардлагад хүлэгдэхгүй байх нь. 
Нэг үеэ бодвоол Монголд гаднын уран бүтээлчид их ирдэг болсон. Монголчууд ч шоу тоглолтуудыг үзэх соёлд суралцсан. Харамсалтай нь зохион байгуулагчид нь суралцахгүй байна. 
Яагаад Солонгос дуучны тоглолт гэхээр солонгос шар айраг уух ёстой гэж... Уг нь үзэгчид мөнгө төлж, тасалбар худалдан авч байгаагийн хэрээр сонголттой байх ёстой. 
Бүр эсэргүү үзэл гаргавал үнэндээ Солонгос дуучин байтугай энгийн иргэд нь ч ирэхдээ уух ус, хэрэглэх салфеткаа бариад ирдэг эх оронч худалдааг дэмжигчид байдаг юм шүү. 
Гэтэл монголчууд эх орны үйлдвэрүүдийг дэмжих байтугай хөрөнгө, мөнгийг нь ч эргэлтэд оруулахгүй шууд валют болгон гадаад руу урсгаж байх гэж. 
Нүүр улайхааргүй брендтэй хэрнээ их мөнгөний өмнө түүнээсээ татгалзаж байгаа нь энэ удаагийн шоуны хувьд эх  орноо дорд үзсэн явдал болох нь дээ.