ХӨСҮТ: Хордлогод өртсөн хүмүүсийн 15-33 хувьд халдварын шинж тэмдэг илэрсэн

Өмнөговь аймагт үйл ажиллагаа явуулдаг уул уурхайн компанийн ажилчид хоолны хордлогод орсны улмаас ХӨСҮТ-д хэвтэн эмчлүүлж байна. Өмнөговь аймагт хордлого гарснаас хойш ХӨСҮТ-өөс эмнэлзүй болон тандалт хийж, хариу арга хэмжээ авах мэргэжлийн баг ажиллаж шинжилгээний дүнгүүд гарсан байна. Өмнөговь аймаг дахь уул уурхайн компаниудад  3 дугаар сарын 17-нд 548 хүн, 4 дүгээр сарын 13-нд 970, 4 дүгээр сарын 6-нд 802 хүн хоолны хордогот халдварт өртжээ. Өртсөн хүмүүсийн 78 хувийг асуумж судалгаанд хамруулахад 15-33 хувьд халдварын шинж тэмдэг илэрсэн байна. Халдварт өртсөн хүмүүсийн 74 хувийг шинжилгээнд хамруулж, 46 хувь нь халдвар авсан нь батлагдсан. Нийт шинжилгээний 29 тохиолдолд сальмонеллын нян илэрсэн байна. Хордлогын дэгдэлт гарсан 3 дугаар сарын 17-ны  өдрийн дэгдэлтээс 70, 4 дүгээр сарын 6-ны тохиолдол хүртэл 119, 4 дүгээр сарын 13-ны дэгдэлтээс 117 хүн ХӨСҮТ-д ирж хэвтэн эмчлүүлжээ.  Ихэвчлэн 20-30 насныхан халдварт өртсөн. Гэдэс базалж өвдөх, халуурах, толгой өвдөх шинж тэмдэг илэрсэн. Хүнд болон хүндэрсэн тохиолдол цөөн байна гэж ХӨСҮТ-өөс мэдээллээ. 

ХӨСҮТ-ийн мэргэжлийн багаас Гал тогоо болон угаалын өрөөг ариутгах, агуулах зэргийг батлагдсан хуваарийн дагуу тогтмол ариутгах, гал тогооны ажилчдыг урьдчилан сэргийлэх үзлэг, шинжилгээнд хамруулах, хоол үйлдвэрлэлд оролцож буй бүх хүнийг гар угаах нөхцөлөөр хангах зэрэг зөвлөмж өгсөн байна.