ШУУД: Долоон хүний амь нас хохирсон Дүнжингаравын дэлбэрэлтийн шүүх хурал болж байна

Долоон хүний амь нас хохирсон Дүнжингарав худалдааны төвийн урд гарсан дэлбэрэлтийн шүүх хурал өнөөдөр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд болж байна. 

Эргэн сануулахад, 2024 оны 1 дүгээр сарын 23-24-нд шилжих шөнө 01:00 цагийн орчимд нийслэлийн Баянзүрх дүүргийн 26 дугаар хороонд байрлах “Дүнжингарав” худалдааны төвийн урд замд газ тээвэрлэж явсан том оврын автомашин дэлбэрсэн. Дэлбэрэлтийн улмаас онцгой байдлын гурван албан хаагч, дөрвөн иргэн амиа алдаж, 228 иргэн, 15 аж ахуйн нэгж, байгууллагын эд хөрөнгөд 18.8 тэрбум төгрөгийн хохирол учирсан нь тогтоогдоод байгаа юм.  Тус хэргийн шүүх хурлын урьдчилсан хэлэлцүүлэг яг одоо болж байна. Уг хэрэгт яллагдагчаар “Дашваанжил” ХХК-ийн захирал, том оврын машины жолоочийг татсан гэж хуулийн байгууллагаас мэдээлсэн билээ. 

Тус хэрэг дээр ажлын хэсэг байгуулагдсанаас хойш гал түймрийн улмаас иргэн, аж ахуйн нэгжид учирсан хохирлын хэр хэмжээ, гал гарсан шалтгаан нөхцөлийг тогтоохоор зургаан төрлийн 76 шинжилгээ хийлгэхээр шинжээч томилж 75 дүгнэлтийг гаргуулж, 350 гаруй хүнээс мэдүүлэг авсан талаар албаныхан мэдээллээ.