Шахааны хүн, шахааны местүүд

Төрийн байгууллагуудын хэмнэлтийн горим зөвхөн уриа лоозон төдий байсныг нотлох үйл явдлууд он гарснаас хойш хэтэрхий ойрхон давтамжтай явагдаж байгааг энд онцлох нь зөв биз. Төсвийн мөнгө үргүй зарцуулахаас гадна хэрэгтэй хэрэггүй албан тушаал бий болгож шахааны хүмүүсийг авдаг тогтолцоогоо  төр хэзээ зогсоох вэ.

 Товчхондоо, төр, орон нутгийн өмчит байгууллагуудад хяналт тавьж, бүтээмж нэмэгдүүлэх нэртэй хяналт, бүтээмжийн менежерүүдийн албан тушаалыг бий болгожээ.

 Засгийн газрын 311 дүгээр тогтоол, Нийслэлийн Засаг даргын 1106 захирамжийн дагуу байгууллагын үйл ажиллагааны дотоод үйл ажиллагааг хянах нэгж, ажилтан гэж угаас байдаг. Үүнд бүх зохицуулалтыг хийсэн байдаг. Ийм байхад хяналтын менежер, бүтээмж хариуцсан менежер зэрэг давхардсан чиг үүрэгтэй местийг бий болгох нь хэний эрх ашиг вэ.

 Эх сурвалжийн мэдээллээр 23 төрийн өмчит компанид 250-350 менежер шинээр томилогдож байгаа аж.  Бүтээмж хариуцсан менежер, хянлтын менежерүүд дунджаар 6 сая төгрөгийн цалинтай юм байна. Жилийн цалин 72 сая төгрөг болж байна. 

 Тухайлбал, өмнөх парламентын эмэгтэй гишүүдээс  УИХ-ын гишүүн асан М.Оюунчимэг “Монголросцветмет” ТӨҮГ-ын Орлогч даргын статус бүхий Бүтээмж хариуцсан менежерээр томилогдоод байна. Харин хяналтын менежерт АН-аас томилгоо оржээ.

 “Дарханы төмөрлөгийн үйлдвэр” ТӨХК-нд хяналт хариуцсан менежерээр ХҮН-ын тодотголтой, 2024 оны УИХ-ын сонгуулийн 6-р тойрогт  тус намаас нэр дэвшиж байсан Д.Баярбилэг, бүтээмж хариуцсан менежерээр АН-ын тодотголтой Г.Одхүү нар томилогджээ.

 “Эрдэнэт” ТӨҮГ-т бүр дөрвөн менежер томилогдсон. УИХ-ын сонгуулийн 10 дугаар тойрогт нэр дэвшиж байсан АН-ын И.Мөнхжаргал нар багтжээ.  Сүүлийн өдрүүдэд хийгдсэн энэ мэт томилгоодтой холбоотойгоор олон нийтээс шүүмжлэлтэй байр суурийг илэрхийлсээр байна.