Утаагүй тамхины хэрэглээг хяналттай болгох санаачилгад нэгдэхийг уриалж байна

Монголд хамгийн сайн хэрэгжсэн хуулийн нэг нь Тамхины хяналтын тухай хууль гэдэгтэй хэн ч санал нийлнэ. Бууз хуушуур зардаг жижиг цайны газраас эхлээд нийтийн тээврийн автобусны арын суудалд ч тамхи уугиулчихдаг, энэ нь ердийн мэт байсан хэрэглээг дээрх хууль цэгцэлсэн юм. Орц, нийтийн орон сууц, зам талбай, оффис, сургуулийн орчинд тамхи татахыг хориглож, худалдаа, борлуулалтыг нь ч хяналттай болгоход хүмүүс дэмжин хүлээн авч, нийтээр даган мөрдсөн. Янжуур тамхины хяналт амжилттай хэрэгжсэн улс орнуудад утаат тамхины хэрэглээ 50 хувиар буурсан улс орнуудын жишээ Япон, Солонгос, АНУ гээд үргэлжилнэ. Үүнтэй зэрэгцээд утаат тамхийг орлуулах утаагүй бүтээгдэхүүний хэрэглээ нэмэгдэх хандлага бас бий. Өнөөдөр Монголд энгийн мэт дасал болж байгаа хэрэглээний нэг нь мөн утаагүй тамхин бүтээгдэхүүнүүд юм. 

Нас, насныхны хэрэглээ болж буй утаагүй тамхин бүтээгдэхүүнүүд никотин агуулдаг ч шаталт үүсгэхгүйгээр халалтын явцад уур, аэрозоль хэлбэрээр биед нэвтрүүлдэг учир орчин, нөхцөл шаардаад байдаггүй. Тийм ч учраас үүнийг тамхи гэж хүлээж авахгүйгээр хаана л бол хаана хэрэглэх болсон нь дасал үүсгэжээ. Ялангуяа өсвөр насныханд энэ нь таагүй үлгэрлэл үзүүлж буй. Утаагүй тамхин бүтээгдэхүүнийг хууль, эрх зүйн орчинд хяналт зохицуулалттай болгосон улс орнуудын туршлагаас харахад нэгдүгээрт, импортын бүтээгдэхүүнд орц, найрлагын өндөр стандарт тогтоох замаар хэрэглэгчдийн аюулгүй байдлыг хамгаалахын зэрэгцээ татвар тогтоосноор үнэ нь харьцангуй нэмэгддэг тул өсвөр насныхны хэрэглээнд тодорхой хязгаарлалт бий болгодог байна. Мөн хэрэглэх орчныг зохицуулалт, журамтай болгосноор хавтгайрсан хэрэглээ болох нөхцөл хязгаарлагддаг. Түүнчлэн эрүүл мэндэд үзүүлэх нөлөөг сануулах ёстой. Эрүүл мэндийн сөрөг нөлөөллийг сануулах нь хэрэглэгч үүнээс татгалзах нөхцөл болдог.

Утаагүй тамхин бүтээгдэхүүний хэрэглээг эрх зүйн зохицуулалттай болгох шаардлагатай байгаа талаар эмч, мэргэжилтнүүд УИХ-ын гишүүдэд хандаад байгаа бөгөөд Монголын Интервэншнал Пульмонологийн Нийгэмлэгээс тэрхүү өргөх бичигт иргэдийн саналыг авах ажлыг зохион байгуулж байгаа юм. Иргэд өөрсдийн эрүүл мэнд, эрх ашиг, ирээдүй болсон үр хүүхдийнхээ зөв дадал зуршлын төлөө хууль тогтоох үйл явцад дуу хоолойгоо нэгтгэх, хэрэгцээ шаардлагатай зохицуулалтыг парламентаас шаардах нь ардчиллын хэм хэмжээ, иргэний эрх, үүргээ биелүүлж буйн нэг илэрхийлэл болно.

Утаат янжуур тамхи бүх эрхтэнд хортой нөлөөлдөг гэдгийг шинжлэх ухаанаар баталсан. Зөвхөн уушги, тархи толгой, судсыг хатууруулдаг, зүрхний шигдээс харвалтын шалтгаан болдог төдийгүй нөхөн үржихүйн системд мөн нөлөөлдөг. Сүүлийн үед бий болсон  утаагүй бүтээгдэхүүн буюу зажилдаг, цахилгаан, халаадаг тамхи нь судалгааны шатанд явж байна. “Яг одоогийн байдлаар “цахилгаан, халаадаг тамхи уушгины хавдар үүсгэжээ” гэсэн судалгаа байхгүй ч хэрэглээний хэмжээ хязгаар нь хэтрэх юм бол хэт мэдрэгшлийн шалтгаант уушгины хатгаа үүсгэдэг нь батлагдсан” гэж анагаах ухааны доктор, уушгины эмч Ц.Маналжав УИХ-ын гишүүдэд хандсан өргөх бичгийн талаар тайлбарлахдаа хэллээ. 

Яг одоо энэхүү өргөх бичигт Иргэн та саналаа нэгтгэх бол энэхүү холбоосоор хандаарай.

https://www.khorbaga.mn/petiti...