УОК: Түймэрт өртсөн айл өрхүүдэд гэр олгоно

Зүүн аймгуудын түймрийн нөхцөл байдал, цаашид авч хэрэгжүүлэх тусламж арга хэмжээний талаар Улсын онцгой комиссоос мэдээлэл хийлээ.

3 дугаар сарын 10-ны өдөр гарсан түймрийн улмаас 170 орчим га талбай түймэрт өртөж, 38 гэр, дөрвөн чингэлэг, дөрвөн автомашин, хоёр мотоцикл, 48 хашаа саравч,  3706 бог, 48 бод мал, 3,500 орчим боодол өвс шатсан гэх мэдээлэл байна. Түймрийн хохирлыг тогтоох ажил эцэслэн гараагүй бөгөөд хохирлыг тогтоох ажлын хэсэг сум орон нутгуудад ажиллаж байна. 

Онцгой байдлын газарт Дундговь аймгийн Өндөршил, Хэнтий аймгийн Өмнөдэлгэр сумдад түймрийн дуудлага мэдээлэл ирсэн ба түймрийг унтраажээ. Өнөөдрийн байдлаар Сүхбаатар аймгийн Асгат болон Эрдэнэцагаан суманд гарсан түймрийг цурамд оруулж бүрэн унтраахаар ажиллаж байгаа юм. 

Түймэрт өртсөн айл өрхүүдийн нөхцөл байдал хүнд байгаа учир УОК-оос эхний ээлжинд малчдад сэтгэлзүйн болон эмнэлгийн тусламж үзүүлэхэд анхаарч, мөн орон гэрийг нь сэргээхэд тусламж үзүүлэхээр болжээ. Шадар сайд С.Амарсайханы тушаалаар түймэрт өртсөн айл өрх, иргэд, хүүхэд багачуудад эмнэлгийн тусламж үйлчилгээ үзүүлэх, орон гэр, орчны сэргээн босголтыг зохион байгуулах, сэтгэл зүйн зөвлөгөө өгөх, галд өртсөн мал сүргийг эрүүлжүүлэх, малын сэг зэмийг устгах, ариутгал халдваргүйтэл хийх, амжиргааг нь дэмжих шуурхай ажиллагааны ажлын хэсгийг өчигдөр байгуулсан бөгөөд хоёр ажлын хэсэг зүүн аймгуудад ажиллахаар замдаа гарчээ.