"Бүргэдийн баяр-2025" үзэх иргэдэд аяллын автобус үнэ төлбөргүй үйлчилнэ

“Бүргэдийн баяр” 19 дэх жилдээ “Чингис хааны хүрээ” аялал жуулчлалын цогцолборт  эхэллээ. Энэ удаагийн баярт Баян-Өлгий, Төв, Сэлэнгэ, Архангай аймгаас нийт 22 бүргэдчин оролцож байна. Мөн Казахстан болон Киргизстан улсаас төлөөлөл хүрэлцэн иржээ. Хоёр өдөр үргэлжлэх "Бүргэдийн баяр-2025" үзэж сонирхох иргэдэд Улаанбаатар хотын аяллын автобус үнэ төлбөргүй үйлчлэх аж. 

Тэмцээн, уралдааны хэлбэрээр зохион байгуулдаг Бүргэдийн баярын эхэнд тэмцээнд оролцох бүргэдчид үндэсний хувцсаараа гоён гаршуулсан бүргэдээ гарын шуун дээр суулгаж, бүргэдээр ан хийхэд тусгайлан сургасан морьтой жагсан орж ирдэг. Эндээс уламжлалт зан заншлыг хадгалсан байдал болон дээл хувцасны өнгө дизайн зэрэг бүх элементийг нарийн шүүж тунгаан, хамгийн сайхан үндэсний хувцас, морь, бүргэдийн тоноглолтой шилдэг бүргэдчинийг шалгаруулдаг юм. 

-Бүргэдтэй парад /Хамгийн сайхан үндэсний хувцастай, бүргэдтэй, морины тоноглолтой бүргэдчиний шалгаруулалт/

- Бүргэдээр шырга /хиймэл өгөөш/ бариулах тэмцээн

- Бүргэдээ хэрхэн сайн сургасан байдлыг шалгаруулах тэмцээн

- Казах үндэсний тоглоом /көкбар-тулам булаалдах, газраас зоос шүүрэх тэмцээн/ тус тус болно.