Долоон хүн нас барж, 18.8 тэрбумын хохирол учирсан “Дүнжингарав“-ын хэргийн шүүх хурал өнөөдөр болно

"Дүнжингарав"-ын ослын хэрэгт яллагдагчаар татагдсан "Дашваанжил"-ын жолооч Ч.Ренцэндорж, захирал Н.Баатаржав нарт холбогдох шүүх хурал өнөөдөр болно. Уг ослын улмаас долоон хүн нас барж, 18.8 тэрбумын хохирол учирсан гэж тогтоогдоод буй юм.   

Эргэн сануулахад, 2024 оны нэгдүгээр сарын 24-ний өдөр Баянзүрх дүүргийн 26 дугаар хороо, Дүнжингарав худалдааны төвийн урд зам дээр газ тээвэрлэж явсан том оврын машин дэлбэрч, их хэмжээний хохирол учирсан билээ. Ослын улмаас Онцгой байдлын газрын гурван албан хаагч, явган болон автомашинаар зорчиж явсан 4 иргэн нас барж, таван хүн хүнд, нэг хүн хүндэвтэр, 35 хүнд хөнгөн зэргийн гэмтэл авсан байдаг. Мөн 36 тээврийн хэрэгсэл, гурван барилга байгууламж шатаж, 228 иргэн, 15 аж ахуйн нэгж байгууллагын эд хөрөнгөд хохирол учирсан болох нь тогтоогдсон байдаг.