О.Мишээл: Иргэд түлшний хиймэл хомсдол үүсгээд байна

Сайжруулсан шахмал түлшний эрэлт, нийлүүлтийн талаар "Тавантолгой түлш" компанийн Борлуулалт хариуцсан дарга О.Мишээлээс тодрууллаа.

-Сүүлийн үед иргэдэд тулгамдаж байгаа асуудлын нэг сайжруулсан шахмал түлшний олдоц. Сайжруулсан шахмал түлш олдоц  багассан нь юутай холбоотой вэ?
-Энэ долоо хоногийн даваа гарагаас сайжруулсан шахмал түлш борлуулах цэгүүдэд таван тонн түлш нийлүүлж эхэлсэн. Учир нь цаг агаар дулаарсан учраас нийлүүлтээ багасгасан юм. Үүнээс өмнө 10 тонноор нийлүүлж байсан. Өнөөдрөөс эхлээд нэг цэгт 10 тонн түлш нийлүүлсэн. Өмнөх өдрүүдэд тухайн нүүрс борлуулах цэгээс захиалгыг нь аваад хүргэлт хийсэн бөгөөд нийт 2300 тонн нүүрс борлуулалтын цэгүүдэд тараагдсан.
-Сар шинийн баяр дөхсөн байна. Үүнийг дагаад айл өрхийн түлшний хэмжээ нэмэгдэж байна уу?
-Энэ сарын 04-нөөс аж ахуй нэгжүүдэд ангилсан түлшийг зарах шийдвэр гарсан. Үүнийг 250 мянгаар борлуулахаар болсон. Үүнийг иргэд буруу ойлгоод хиймэл хомсдол үүсгээд байж мэднэ. Мөн цахилгааны үнэ нэмэгдсэнтэй холбоотойгоор зарим айлууд цахилгаан халаалтаа зуухаар сольж шахмал түлшний эрэлт өссөн. Цагаан сар болох гэж байгаа учраас гадуур хөдөлгөөн ихтэй байна. Үүнийг дагаад түгжрэл нэмэгдсэн. Замын ачааллаас шалтгаалж түргэн хугацаанд захиалсан нүүрсийг нь хүргэж чадахгүй байна. Энэ нь иргэдэд хүндрэл учруулж болох юм. 
-Өнөөдөр хэдэн дүүрэгт хэр хэмжээний түлш нийлүүлсэн бэ?
-Өнөөдрийн хувьд долоон дүүрэгт борлуулалтын 160 цэгт 1050 тонн түлш нийлүүлсэн. Баянзүрх дүүргийн 103 цэгт 710 тонн, Хан-Уул дүүргийн 33 цэгт 280 тонн, Сүхбаатар дүүргийн 37 цэг 235 тонн, Чингэлтэй дүүргийн 60 цэг 475 тонн, Баянгол дүүргийн 20 цэг 120 тонн, Налайх дүүргийн 26 цэг 135 тонн түлш нийлүүлэгдсэн. Нийтдээ 3005 тонн сайжруулсан түлшний захиалга орж ирсэн. 16 цагийн байдлаар 2100 тонн түлш борлуулалтын цэгт очсон. Үлдсэн нь үйлдвэрээсээ ачилтаа хийгээд цэгүүд рүү тараахаар ажиллаж байна.
-Асуудлыг урьдаас тооцоолох чухал. Үйлдвэрт сайжруулсан шахмал түлшний нөөц хэр байгаа вэ?
-Ямар нэгэн байдлаар эрсдэл үүсэхийг үгүйсгэхгүй. Тэрийгээ бид тооцоолоод 17 агуулахад 30 мянган тонн нөөцтэй байна. Харин үйлдвэрийн бүсэд 10 тонны нөөцтэй байгааг дуулгая. Өнгөрсөн жил манайх энэ үед 20 мянган тонн түлшний нөөцтэй байсан. Энэ жил 40 мянган тонн нөөцтэй байна.
-Сайжруулсан шахмал түлшний чанар анх гарч байсан үетэй харьцуулахад муудсан гэх нь бий. Чанараа хэрхэн шалгадаг вэ? 
-Үйлдвэрт түлшийг үйлдвэрлэнэ. Ингээд талбайд сайжруулсан шахмал түлш орлого болж гардаг. ТУЗ хяналт шалгалт хийгээд чанарын шаардлага хангасан байвал борлуулалтад гаргадаг.