Мазаалай баавгайг сурталчлах аян боллоо

Засгын газрын 2023 оны 12 дугаар сарын 13-ны өдрийн 437 тогтоолоор Мазаалай баавгайг “Үндэсний бахархалт амьтан” болгосон.  Мазаалай баавгайг сурталчлах аян “Монгол” нүүдэлчин фестивалын хүрээнд Үндэсний цэцэрлэгт хүрээлэнд болж байна. Энэ хүрээнд хүүхэд багачуудад зориулсан танин мэдэхүйн АХА тэмцээн зохион байгуулж, энэ амьтны талаар танилцуулсан. 

Мазаалай нь говь цөлийн эрс тэс уур амьсгалд дасан зохицсон байдгаараа бусад хүрэн баавгайн дэд зүйлүүдээс ялгардаг.  Мазаалай нь ойн хүрэн баавгайтай төстэй боловч биеэр бага. Биеийн дундаж жин 90-100 килограмм, урт нь 150, өндөр нь 80-92 сантиметр. Зуны зүс жигд хүрэн бор, хавар шаргал, цайвар өнгөтэй, хумс цагаан, үс богино, тавхайгаараа нүцгэн хэсэг ихтэй. Хүзүү, хөл их биеэсээ бараавтар. Хэнхдэг, хүзүүний угт цагаан цайвар толботой байдаг.