Нийгмийн тулгамдсан асуудлыг илэрхийлэх “Үнэн” дуу

“Яруу арт продакшн”-ыг үүсгэн байгуулагч, хөгжмийн зохиолч, дуучин Б.Санчир, “My Voice” шоуны шилдэг оролцогч, дуучин Г.Тэмүүжинтэй хамтран нийгмийн асуудал хөндсөн шинэ уран бүтээлээ толилуулаад байна. Өнөөгийн нийгмийн тулгамдсан асуудлаас үүдэн бүтсэн “Үнэн” дууны хөгжмийг Б.Санчир зохиож, шүлгийг С.Энхтайван бичжээ.

 
Б.Санчир “Өнөөдрийн Монгол Улсын утаа, түгжрэлийн асуудал чинээндээ тулсан. Хүүхдүүд байнга шахуу ханиад, хатгалгаагаар өвчлөөд, хүмүүс санхүү мөнгөөрөө хохироод л байна. Манай иргэд маш балмад, хэрцгий бүдүүлэг болчихсон мэт анзаарагддаг.  Ихэнх нь оюуны хомсдолд орчихсон юм шиг соёлгүй, бүдүүлэг хандлагатай болжээ. Хаана ч, хэнтэй ч таарсан уурлаж, уцаарласан царай л хардаг боллоо. Сонсохын эцэсгүй аймшигтай хэрцгий хэргүүд ч гарч байна. Энэ бүхэнд л уран бүтээлч хүний хувьд эмзэглэж явдаг юм. Дуучин хүн юм болохоороо талбай дээр гарч зогсох, эсвэл фэйсбүүкээр хий дэмий орилох биш бүтээлээрээ соён гэгээрүүлэх юм сан гэх бодлоос дуу маань төрсөн” гэжээ.