Баянгол дүүрэгт бүртгэгдсэн менингококкт халдварын сэжигтэй тохиолдол шинжилгээгээр үгүйсгэгдсэн байна

Нийслэлд 2025 оны  нэгдүгээр сарын 28-ны өдөр менингококкт халдварын тохиолдол гарсантай холбогдуулан Халдварт өвчин судлалын үндэсний төв, Налайх дүүргийн онцгой комисс, Нийслэлийн эрүүл мэндийн газар болон холбогдох байгууллагууд тандалт, шуурхай хариу арга хэмжээг зохион байгуулан ажиллаж байна. Дүүргийн онцгой комиссын шийдвэрээр Налайх дүүргийн Голомт сургуулийн бага сургууль, 160 дугаар сургууль, 307 дугаар цэцэрлэгийн хичээл сургалтын үйл ажиллагааг цахим хэлбэрт шилжүүлсэн. Ойрын хавьтлуудыг тусгаарлан эрүүл мэндийн байгууллагын хяналтад авах, шинжилгээ авах, сургууль, цэцэрлэгүүдэд ариутгал, халдваргүйтгэл хийх зэрэг арга хэмжээг авч хэрэгжүүлсэн байна.

Түүнчлэн тус дүүрэгт Халдварт өвчин судлалын үндэсний төвийн тандалтын баг дүүргийн эрүүл мэндийн төвтэй хамтран хариу арга хэмжээг авч хэрэгжүүлж байна. Эрүүл мэндийн яамнаас нийслэлийн хэмжээнд үйл ажиллагаа явуулдаг харьяа эмнэлгүүдийн удирдлагуудад менингококкт халдварын тархалт, түүнээс урьдчилан сэргийлэх чиглэлээр холбогдох үүрэг даалгаварыг өгч, удирдлага зохицуулалтаар ханган ажиллаж байна.
Нийслэлийн Баянгол дүүрэгт 2025 оны 1 дүгээр сарын 31-ний өдөр менингококкт халдварын сэжигтэй тохиолдол бүртгэгдсэн боловч лабораторийн шинжилгээгээр үгүйсгэгдсэн байна. Баянзүрх дүүрэгт тууралтат халдварын тохиолдол бүртгэгдсэн бөгөөд Халдварт өвчин судлалын үндэсний төвд хэвтүүлэн эмчилж байна. Одоогоор лабораторийн шинжилгээний хариу хүлээгдэж байна. Халдварт өвчин судлалын үндэсний төвийн тандалтын баг холбогдох арга хэмжээг авч хэрэгжүүлэн ажиллаж байна.

Улсын онцгой комисс болон Шуурхай штабаас Эрүүл мэндийн яам, Халдварт өвчин судлалын үндэсний төв, Нийслэл, дүүргийн онцгой комисстой менингококкт халдварын тархалт, түүнээс урьдчилан сэргийлэх чиглэлээр тогтмол мэдээлэл солилцож, хяналт тавин ажиллаж байна.
Иймд та бүхэн халдвараас урьдчилан сэргийлэх чиглэлээр эрүүл мэндийн байгууллагаас гаргаж зөвлөмжийг хэрэгжүүлж, менингококкт халдварын шинж тэмдэг илэрсэн тохиолдолд эмнэлэгийн байгууллагад хандахыг зөвлөж байна.