ХЭҮК: Морины уралдаан хүүхдийн эрүүл мэнд, амь насанд сөрөг нөлөөтэй

Засгийн газрын 2025 оны нэгдүгээр сарын 29-ний өдрийн хуралдаанаар гаргасан шийдвэртэй холбоотойгоор ХЭҮК байр сууриа илэрхийллээ. 

ХЭҮК-ийн дарга Д.СҮНЖИД "Морины уралдаан хүүхдийн эрүүл мэнд, амь насанд шууд утгаараа сөрөг нөлөө үзүүлдэг, эрсдэл учруулдаг. Хурдан морины уралдаан ЮНЕСКО-гийн соёлын биет бус өвөөр бүртгэгдсэн байдаг. Гэхдээ өвөл, хаврын уралдаан өв соёлд хамаарахгүй. Хурдан морины уралдааныг түүхийг харвал сүүлийн жилүүдэд л эрчимтэй зохион байгуулж байсан. Харин 2019 онд Засгийн газрын гаргасан 57 дугаар тогтоол хүйтний улиралд уралдаанч хүүхдийн эрүүл мэндийн хамгаалах, сурч боловсрох эрхийг хамгаалах, хүүхдийг аюултай хөдөлмөр эрхлүүлэхээс зайлсхийх, түүнийг таслан зогсооход чухал ахиц дэвшил гаргасан шийдвэр байсан. Харин Засгийн газар энэхүү тогтоолоо хүчингүй болгосноороо нэгдүгээрт хүүхдийн ашиг сонирхлыг дээдлэх зарчмаасаа ухарч байгаа бөгөөд үүнд ХЭҮК харамсч байгаагаа илэрхийлж байна. Монгол Улсын засгийн газраас олон улсын гэрээ хэлэлцээр, Монгол Улсын үндсэн хууль болон бусад хууль тогтоомжоо биелүүлж, өчигдөр гаргасан шийдвэрээ эргэн харж, хүүхдэд ээлтэй шийдвэр гаргах нь зүйтэй гэж үзэж байна" гэлээ.