Лос Анжелест дахин хээрийн түймэр гарчээ

Лос Анжелест дахин шинээр хээрийн түймэр гарсан байна. Лхагва гарагийн үдээс хойш хотоос баруун хойд зүгт 70 гаруй км зайд орших Хьюзийн уулархаг нутагт гал гарчээ. Үүний улмаас түүхэнд байгаагүй гамшигт түймэрт автсан бүс нутгийн иргэдийг дахин нүүлгэн шилжүүлэхэд хүрэв. 31 мянган хүнээс гадна сэрэмжлүүлгийн түвшинд 23 мянган хүн байна. Түүнчлэн тухайн бүс нутгийн шоронгоос 500 орчим хоригдлыг нүүлгэн шилжүүлжээ.

Салхи, хуурай цаг агаар зэргээс болж хяналтаас гарсан түймэр хэдхэн цагийн дотор 40 орчим км2 талбайг хамарчээ. Байшин барилгад хохирол учраагүй боловч 31 мянга орчим оршин суугч орон гэрээ орхин дүрвсэн байна. Мөн АНУ-ын баруун эрэг дагуу Мексикээс Канад руу чиглэсэн үндсэн хурдны зам болох "Interstate 5"-ыг хаагаад байна.