Тамхи татсан асуудлаар нийтийн тээврийн жолооч 25 мянган төгрөгөөр торгуулав

Нийтийн тээврийн бодлогын газрын 7004-4040 дугаарт  иргэдээс ирсэн талархлыг хүлээн авч, санал, гомдол, хүсэлт бүрийг тухай бүрд нь шийдвэрлэн ажиллаж байна. Хамгийн сүүлд иргэн Д.Чимэдцэрэнгээс энэ сарын 19-нд ирсэн гомдлыг шийдвэрлэжээ. Ч:32б чиглэлийн 25-071 гарааш дугаартай автобусны жолооч тамхи татаж байхад нь зорчигч шаардлага тавихад хүлээн аваагүй тул арга хэмжээ авч өгнө үү гэжээ. Гомдлын дагуу 25-071 гарааш дугаартай Ч.Буяндалай жолоочид, Зөрчлийн тухай хуулийн 14.6.9 дүгээр заалтаар 25 нэгжээр торгосон байна. 

Мөн Баянгол дүүргийн 14-р хорооны иргэн Булгаа Ч:71 чиглэлийн 01-114 гарааш дугаартай автобусны жолооч энэ сарын 20-ны 07:05 цагт МУБИС-ийн автобусны буудал дээрээс хүнээ авахгүй хоосон явсан гэж гомдол гаргажээ. Гомдлын дагуу шалгахад тухайн жолооч автобусны буудлаас зорчигчоо авч зорчсон бөгөөд гомдол гаргасан иргэн өөрөө буудлаас суугаагүй байжээ. 

Шархад чиглэлд явдаг Ч:34 чиглэлийн автобусны тоог нэмэх. М:4 чиглэлийн автобус хоёр минутын зайтай бараг хүнгүй ирэх юм. Гэтэл Ч:34 нь 10 минут хүлээгээд ирэхгүй, ирсэн нь дүүрэн, хүнээ авахгүй байна. Ямар чиглэлийн автобус нь хүрэлцээ муу, ямар нь хоосон яваад байна гэдэг судалгаа байна уу гэсэн хүсэлт ирүүлснийг шалгажээ.  М:4 чиглэлд нийт 45 автобус 2 минутын зайтай зорчдог бөгөөд өдөрт дунджаар 21 мянган зорчигч үйлчлүүлдэг. Ч:34 чиглэлд нийт 17 автобус 7 минутын зайтай зорчдог бөгөөд өдөрт дунджаар 7800 иргэн зорчдог. Иргэдийн зорчих тооноос хамаарч тухайн чиглэлд хэдэн автобус явах талаар төлөвлөгөө гаргадаг болохыг Нитийн тээврийн бодлогын газраас хэлж байна.